केपे: दक्षिण गोव्यातील केपे येथे भरदिवसा एका दागिन्यांच्या दुकानात चोरीची घटना घडली आहे. शनिवारी (दि. २२) रोजी 'भवानी गोल्ड ज्वेलर्स' नावाच्या दुकानात तीन महिलांनी सुमारे २.५२ लाख रुपयांचे दागिने चोरून पोबारा केला. सीसीटीव्ही फुटेजमध्ये या तिन्ही महिला चोरी करताना स्पष्टपणे दिसत असल्याने पोलिसांचा त्यांच्यावरील संशय अधिक बळावला आहे.

दुकान मालक पिंकी पाल यांनी दिलेल्या माहितीनुसार, तीन महिला दागिने खरेदी करण्याच्या बहाण्याने दुकानात आल्या होत्या. त्याचवेळी एक ग्राहक त्यांच्या शेजारी अंगठी खरेदी करत होता. या संधीचा फायदा घेत, महिलांनी लहान मुलासाठी सोन्याच्या चेनची मागणी केली. मालकीण चेनचा ट्रे आणण्यासाठी बाजूला गेली असता, महिलांनी वर ठेवलेल्या अंगठ्याच्या ट्रेमधून दोन अंगठ्या आणि बाजूला ठेवलेल्या हारांच्या ट्रेमधून एक हार चोरला.

चोरी लक्षात येताच दुकानातील कर्मचारी सीसीटीव्ही फुटेज पाहून महिलांच्या मागावर गेले, परंतु त्या सापडल्या नाहीत. दुकान मालकांनी या घटनेची तक्रार पोलिसांत नोंदवली आहे. पिंकी पाल यांच्या म्हणण्यानुसार, या महिला गोव्यातील नसून हिंदी भाषिक आहेत.

'भवानी गोल्ड ज्वेलर्स' शेजारील दुकानाच्या मालकानेही या घटनेची माहिती माध्यमांना दिली. चोरट्यांनी एक सोन्याची चेन, हार आणि दोन अंगठ्या चोरल्याने दुकान मालकाचे २.५२ लाख रुपयांचे नुकसान झाले आहे. चोरीच्या वेळी दुकानात मालकिणीसह काही कर्मचारी उपस्थित होते. पोलीस या घटनेचा अधिक तपास करत आहेत.