पणजी: पगारातील वाढ, भत्ते आणि 12 महिन्याचा करारनामा हा मुख्यमंत्र्यांनी (CM Pramod Sawant) दिलेला प्रस्ताव धुडकावून लावत आज शनिवारी चौथ्या दिवशीही शिक्षकांनी आंदोलन (Goa Teachter Agitation) कायम ठेवले आहे. हे आंदोलन आहोरात्र सुरू असून गेल्या दोन दिवसांत दोन शिक्षकांची प्रकृती बिघडल्याची घटना घडली होती. त्यामुळे या आंदोलनाकडे संपूर्ण राज्याचे लक्ष लागले आहे.

गेल्या चार दिवसांपासून राज्यातील 54 कंत्राटी शारीरिक शिक्षकांनी आझाद मैदानावर आंदोलन छेडले आहे. शिक्षकांना अनेक राजकीय पक्षांसह संघटनांनी पाठिंबा दर्शविला आहे.

आज गोवा फॉरवर्डचे आमदार विजय सरदेसाई यांनी त्यांची भेट घेऊन कैफियत जाणून घेतली. यावेळी त्यांनी आंदोलनस्थळावरूनच मुख्यमंत्री डॉ. प्रमोद सावंत यांना फोन करून शिक्षकांची समस्या सोडविण्याची मागणी केली. त्याची दखल घेत मुख्‍यमंत्र्यांनी शिक्षकांना महालक्ष्मी शासकीय निवासस्थानी चर्चेसाठी पाचारण केले.

चर्चेदरम्यान मुख्यमंत्र्यांनी सहा महिन्यांपूर्वी दिलेल्या आश्‍वासनांची उजळणी केली. वेतन 16 हजारांवरून 25 हजार करण्याची ग्वाही त्यांनी दिली. त्याशिवाय भत्ते आणि 12 महिन्यांचा सेवा करार करण्याची तयारी दर्शविली. ती शिक्षकांनी धुडकावून लावली असून सेवेत कायम करून घेण्याच्या मागणीवर ते ठाम आहेत.

मुख्यमंत्र्यांनी जुन्याच आश्‍वासनांची उजळणी केली आहे. आमची मागणी सेवेत कायम करा अशी आहे. पगार वाढीचे गाजर दाखवून आम्हाला झुलवत ठेवण्याचा प्रयत्न सरकार करीत असल्याने आंदोलनातून माघार न घेण्याचा निर्णय घेतला आहे. होणाऱ्या परिणामांना सरकार जबाबदार असेल.

- गंगाराम लांबोर, शिक्षक.