पणजी : अरबी समुद्रात निर्माण झालेल्या कमी दाबाच्या पट्ट्यामुळे राज्यात मंगळवारी रात्री आणि बुधवारी पहाटे काही काळ तुरळक सरींनी (Rain) हजेरी लावली. तर काही ठिकाणी मोठ्या सरी कोसळल्या. आज गुरुवारपासून राज्यात पाऊस विश्रांती घेणार असल्याचे हवामान वेधशाळेने (IMD Goa) म्हटले आहे. गोवा राज्यांमध्ये नोव्हेंबर महिन्यात सरासरी 185 मि.मी पावसाची नोंद झाली आहे.

गेल्या दोन दिवसांत राज्यात मुसळधार पावसाची शक्यता वर्तविण्यात आली होती. मात्र, पावसाने बऱ्यापैकी दिलासा दिला आहे. केवळ 12.5 मि.मी. पावसाची नोंद झाली आहे. हवामान बदलत असल्याने कोणत्याही क्षणी अलर्ट जारी केला जाऊ शकतो. पण, सध्यातरी अरबी समुद्रातील हालचाली मंदावल्‍या आहेत. आंध्रप्रदेशात मोठया प्रमाणात वादळी पावसाने हजेरी लावली. त्याचा हा परिणाम गोव्यातही होत आहे, असे गोवा हवामान विभागाने सांगितले आहे.

यंदाच्या हिवाळ्यात थंडीऐवजी पावसाचा अनुभव लोकांना येत आहे. देशात नोव्हेंबरमध्ये 645 वेळा मुसळधार तर 168 वेळा अतिमुसळधार पाऊस पडल्याची माहिती हवामान खात्याने दिली. या नोव्हेंबरमध्ये पडलेला गेल्या पाच वर्षांतील विक्रमी पाऊस आहे. त्याचबरोबर, या महिन्यात 11 वेळा अतिवृष्टीची नोंद झाली. गेल्या वर्षीही नोव्हेंबरमध्ये 11 वेळा अतिवृष्टी झाली होती. यातील बहुतेक अतिवृष्टी दक्षिण भारतात झाली होती. अतिवृष्टीमुळे कर्नाटकात 15 आणि केरळमध्ये तिघांचा मृत्यू झाला होता. आणि आता या अतिवृष्टीमुळे तमिळनाडू, आंध्र प्रदेश, कर्नाटक आदी राज्यांत अनेक भागांत पूरस्थिती निर्माण झाली आहे.