पणजी: नवीन शैक्षणिक धोरणानुसार मागील दोन वर्षे एप्रिल महिन्यात इयत्ता सहावी ते बारावीच्या (अकरावी वगळता) शैक्षणिक वर्षाला एप्रिलमध्ये सुरवात केली जायची; परंतु यंदापासून पूर्वीप्रमाणेच जूनमधूनच शाळा सुरू करण्याचा निर्णय विचाराधीन आहे.

याबाबत मात्र अजून अंतिम निर्णय घेण्यात आलेला नाही. सर्वांशी चर्चा करूनच अंतिम निर्णय घेण्यात येणार असल्याचे गोवा राज्य शैक्षणिक संशोधन आणि प्रशिक्षण परिषदेच्या संचालक मेघना शेटगावकर यांनी सांगितले.

शेटगावकर म्हणाल्या की, मागील दोन वर्षे ‘एनईपी’नुसार विद्यार्थ्यांसाठी ‘सेतु अभ्यासक्रमा(ब्रीज कोर्स)’चे आयोजन करण्यात येत होते, ते पुढील वर्षांपासून असणार नाही. त्यामुळे नवीन शैक्षणिक वर्ष जूनमधून सुरू करत असताना शाळांचे तास वाढवावे लागणार का? असे अनेक प्रश्‍न आहेत. यासंबंधी शिक्षणतज्ज्ञ, शाळांचे मुख्याध्यापक आदींशी चर्चा करूनच नंतर निर्णय घेण्यात येईल.

पंधरा दिवसांत पुस्तके!

माध्यमिक विद्यालयांना पाठ्यपुस्तके एप्रिल महिन्यात पुरविण्यात आली आहेत. आता केवळ प्राथमिक शाळांच्या विद्यार्थ्यांना पाठ्यपुस्तके पुरविणे बाकी आहे. पुढील पंधरा दिवस प्राथमिक विद्यार्थ्यांसाठी उजळणी घेण्यात येणार आहे. त्यामुळे पुढील पंधरा दिवसांत राज्यातील सर्व प्राथमिक शाळांना पाठ्यपुस्तके उपलब्ध होतील. वेळेत विद्यार्थ्यांना पाठ्यपुस्तके मिळावीत याची काळजी घेण्यात आल्याचे शेटगावकर यांनी सांगितले.