Goa SSC Exam 2025 Begins From March 1 Exam Centers And Student Details

पणजी: गोव्यात उद्यापासून म्हणजेच 1 मार्चपासून (शनिवार) दहावीची परीक्षा सुरु होणार आहे. राज्यातील 32 केंद्रे यासाठी निश्चित करण्यात आली आहे. या 32 केंद्रांवर तब्बल 18871 विद्यार्थी परीक्षेला बसणार आहेत.

परीक्षेचा कालावधी काय?

दरम्यान, दहावीची ही परीक्षा 1 मार्चपासून सुरु होऊन 21 मार्च 2025 पर्यंत चालणार आहे. उद्या (शनिवार) पहिली भाषा (इंग्रजी/मराठी/उर्दू) विषयाचा पेपर होणार आहे. दररोज सकाळी 9.30 ते 12.30 वाजेपर्यंत पेपर असणार आहे.

यंदा विद्यार्थ्यांपेक्षा विद्यार्थिनींचा आकडा अधिक

यंदा दहावीच्या परीक्षेसाठी विद्यार्थ्यांपेक्षा विद्यार्थीनींचा आकडा जास्त आहे. 9297 विद्यार्थी तर 9574 विद्यार्थींनी परीक्षा देणार आहेत. विद्यार्थ्यांना प्रत्येक पेपर सुरु होण्यापूर्वी अर्धा तास अगोदर म्हणजेच 9 वाजता परीक्षा केंद्रावर उपस्थित रहावे लागणार आहे. गेल्या वर्षी 18914 विद्यार्थ्यांनी दहावीची परीक्षा दिली होती. गत वर्षापेक्षा यंदा विद्यार्थ्यांचा आकडा हा कमी झाल्याचे सांगितले जात आहे.

परीक्षेची तयारी

विद्यार्थ्यांबरोबर (Student) राज्य शिक्षण मंडळानेही तयारी केली आहे. परीक्षेदरम्यान कोणताही अनुचित प्रकार घडणार नाही याची खबरदारी अधिकाऱ्यांकडून घेतली जात आहे. कडक बंदोबस्तात ही परीक्षा पार पडणार असल्याचे अधिकाऱ्यांकडून सांगण्यात आले आहे.