पणजी : गोवा शालांत मंडळाचा दहावीचा निकाल उद्या 1 जून रोजी संध्याकाळी 5.30 वा. जाहीर होणार आहे. एकत्रित निकालपत्रिका 3 जून रोजी सकाळी 9 वाजल्यापासून शाळेच्या लॉगिनवरून डाऊनलोड करण्यासाठी उपलब्ध असतील. मंडळाच्या अधिकृत संकेतस्थळावर निकालाची प्रत उपलब्ध करण्यात येणार आहे, अशी माहिती मंडळाचे अध्यक्ष भगिरथ शेट्ये यांनी दिली. (Goa SSC Exam Result)

दहावीची परीक्षा 31 परीक्षा केंद्र व 173 उपकेंद्रावर घेण्यात आली होती. परीक्षेला एकूण 20,572 मुले बसली होती. त्यामध्ये 10,530 मुले तर 10,042 मुलींचा समावेश होता. काही दिवसांपूर्वीच बारावीचा निकाल जाहीर करण्यात आला होता. बारावीच्या निकालात मुलींनी बाजी मारल्याचं चित्र होतं. आता दहावीच्या निकालातही तशीच पुनरावृत्ती होते का हे पाहणं महत्त्वाचं ठरणार आहे.

गोवा राज्य माध्यमिक आणि उच्च माध्यमिक शिक्षण मंडळाच्या वतीने घेण्यात आलेल्या बारावी परीक्षेचा निकाल 92.66 टक्के लागला. यंदाही बारावीच्या परीक्षांमध्ये मुलींनी बाजी मारली असून 94.58 टक्के मुली उत्तीर्ण झाल्या आहेत. तर मुलांचे उत्तीर्ण होण्याचे प्रमाण 90.66 टक्के आहे. शिक्षण मंडळाने यंदा बारावीची परीक्षा दोन सत्रांत 18 केंद्र आणि 72 उपकेंद्रांवर घेतली होती. यासाठी राज्यभरातून 18 हजार 201 विद्यार्थी बसले होते. यापैकी कला शाखेमध्ये 4 हजार 754, वाणिज्य शाखेत 5 हजार 496, विज्ञान शाखेत 5 हजार 77 तर व्यावसायिक शाखेमध्ये 2 हजार 874 विद्यार्थी परीक्षेला बसले होते.