Vedanta- Sesa Goa राज्यातील ज्येष्ठ क्रीडापटूंची काळजी घेण्यासाठी ‘असोसिएशन फॉर द वेलबिईंग ऑफ एल्डर स्पोर्टसपर्सन्स’ (अवेस) संघटना गेली काही वर्षे सातत्याने कार्यरत आहे.

त्यांनी आता ‘वेदांता-सेझा’च्या सहकार्याने ज्येष्ठांच्या कल्याणाबरोबरच क्रीडा क्षेत्रात युवा विकासाचाही विडा उचलला असून त्यांच्यातर्फे व्हेटरन्स, तसेच 15 वर्षांखालील मुलगे व मुलींसाठी फुटबॉल स्पर्धा घेण्यात येईल.

अवेस-सेझा वेदांता यांच्यातर्फे शनिवारी पत्रकार परिषदेत फुटबॉल स्पर्धा आयोजनाची माहिती देण्यात आली. यावेळी स्पर्धेतील संघांची गटवारी आणि वेळापत्रकही जाहीर करण्यात आले.

त्यावेळी भारताचे माजी फुटबॉल कर्णधार ‘पद्मश्री’ ब्रह्मानंद शंखवाळकर, गोवा फुटबॉल असोसिएशनचे अध्यक्ष कायतान फर्नांडिस, ‘अवेस’ संस्थापक पदाधिकारी आल्बर्ट कुलासो, सेझा गोवाचे मुख्य कार्यकारी अधिकारी नवीन जाजू, लीना वेरेकर, तसेच ‘अवेस’चे इतर पदाधिकारी उपस्थित होते.

व्हेटरन्स वयोगटातील स्पर्धा २४ सप्टेंबर ते सात ऑक्टोबर या कालावधीत खेळली जाईल. या स्पर्धेत चिंचोणे, बार्देश, तिसवाडी, चांदर, वास्को, मुरिदा-फातोर्डा, कळंगुट व नावेली हे संघ आहेत.

15 वर्षांखालील मुलींची स्पर्धा 25 ते 29 सप्टेंबर या कालावधीत होईल आणि एफसी म्हार्दोळ, प्रोग्रेस, कम्पेशन, सिकेरी एफसी या संघांत चुरस असेल. 15 वर्षांखालील मुलांची यूथ कप स्पर्धा 30 सप्टेंबर ते 8 ऑक्टोबर या कालावधीत आठ संघांत खेळली जाईल.

या स्पर्धेत साऊथ गोवा युनायटेड, साळगावकर एफसी, धेंपो स्पोर्टस क्लब, सेझा फुटबॉल अकादमी, एफसी गोवा या राज्यातील पाच संघांसमवेत बंगळूर एफसी, जमशेदपूर एफसी, बेळगाव युनायटेड या बाहेरगावच्या तीन संघांचा समावेश आहे.