म्हापशात 'रेंट-अ-बाईक' चालकांमध्ये थरार! वादातून एकाने दुसऱ्याचा कानच तोडला; भररस्त्यातील रक्तापाताने हादरले नागरिक

म्हापसा: म्हापसा शहरात सोमवारी (29 डिसेंबर) रात्री दोन 'रेंट-अ-बाईक' चालकांमध्ये झालेल्या हिंसक संघर्षाने संपूर्ण परिसरात घबराट पसरली. क्षुल्लक कारणावरुन सुरु झालेल्या या वादाचे रुपांतर हाणामारीत झाले आणि संतापलेल्या एका चालकाने दुसऱ्या चालकाचा कानच दाताने तोडून काढल्याचा धक्कादायक प्रकार घडला. या घटनेतील गंभीर जखमी चालकाला तात्काळ उपचारासाठी गोवा मेडिकल कॉलेज हॉस्पिटलमध्ये हलवण्यात आले.

मिळालेल्या माहितीनुसार, म्हापसा शहरात सोमवारी रात्री दोन रेंट-अ-बाईक चालकांमध्ये कोणत्यातरी विषयावरुन बाचाबाची सुरु झाली. पाहता पाहता या वादाने रौद्र रुप धारण केले आणि दोघांमध्ये तुंबळ हाणामारी झाली. या संघर्षादरम्यान आरोपीने अत्यंत हिंसक पवित्रा घेत समोरच्या व्यक्तीच्या कानाचा काही भाग दाताने तोडून टाकला. भररस्त्यात झालेला हा रक्तापात पाहून स्थानिक नागरिक आणि पर्यटक भयभीत झाले.

पीडित आणि आरोपीची ओळख

या हल्ल्यात गंभीर जखमी झालेल्या व्यक्तीचे नाव नितेश कांदोळकर असे असून तो बस्तोडा येथील तेलिया वाडो येथील रहिवासी आहे. नितेश स्वतः रेंट-अ-बाईक चालवतो. त्याला तातडीने म्हापसा येथील रुग्णालयात दाखल करण्यात आले, परंतु जखम गंभीर असल्याने डॉक्टरांनी त्याला अधिक उपचारांसाठी बांबोळी येथील गोवा मेडिकल कॉलेज हॉस्पिटलमध्ये पाठवले. म्हापसा पोलिसांनी याप्रकरणी संशयित आरोपी समीर पेडणेकर याला ताब्यात घेतले.

पोलिसांची कारवाई आणि तपास

घटनेची माहिती मिळताच म्हापसा (Mapusa) पोलिसांनी तातडीने घटनास्थळी धाव घेतली. पोलिसांनी दोन्ही व्यक्तींना ताब्यात घेऊन वैद्यकीय तपासणीसाठी पाठवले. या वादाचे नेमके कारण काय होते? जुन्या वैमनस्यातून हा प्रकार घडला की व्यवसायातील स्पर्धेतून? याचा तपास पोलीस करत आहेत. या घटनेमुळे म्हापसा शहरातील कायदा आणि सुव्यवस्थेवर प्रश्नचिन्ह उपस्थित झाले असून पर्यटकांच्या गर्दीच्या काळात अशा घटना घडल्याने स्थानिकांमध्ये संताप व्यक्त होत आहे.