Star Contender Table Tennis: भारताच्या मानव ठक्कर व मानुष शाह याने डब्ल्यूटीटी स्टार कंटेंडर 2024 टेबल टेनिस स्पर्धेत पुरुष दुहेरीत उपांत्यपूर्व फेरी गाठली. महिलांच्या दुहेरीत तनिषा कोटेचा व सायली वाणीही यांनी विजयी कूच राखली.

स्पर्धा पेडे-म्हापसा येथील क्रीडा संकुलात सुरू आहे. एकेरीत श्रीजा अकुला, अर्चना कामत यांनी महिला एकेरीत विजय नोंदविले.

पुरुष दुहेरीत गुजरातच्या मानव व मानुष जोडीने इंडोनेशियाच्या पँग येव एन कोएन व अवतार क्वेक इझाक जोडीला ३-० (११-७, ११-९, ११-५) असे हरवून बाद फेरीत प्रवेश केला.

महाराष्ट्राच्या तनिषा व सायली जोडीने चुरशीच्या लढतीत विजय नोंदवून अखेरच्या आठ जोडींच्या फेरीत प्रवेश केला. त्यांनी स्वीडनच्या ख्रिस्तिना कॉलबर्ग व फिलिपा बेर्गां जोडीला ३-१ (११-९, ४-११, ११-८, ११-७) असे नमविले. भारतीय महिला जोडीसमोर उपांत्यपूर्व फेरीत दक्षिण कोरियाच्या जिओन जिही व शिन युबिन या जोडीचे आव्हान असेल.

महिला एकेरीत आगेकूच राखताना भारताच्या अर्चना कामत हिने स्पेनच्या मारिया झियाओ हिच्यावर ३-० (११-७, १३-११, १२-१०) असा विजय मिळविला. श्रीजा अकुला हिने फ्रान्सच्या कामिली लुत्झ हिला ३-१ (११-५, ९-११, ११-७, ११-८) असे हरविले. श्रीजा पुढील फेरीत इजिप्तच्या हाना गोदा हिच्याविरुद्ध खेळेल.

पुरुष एकेरीत हरमीत देसाई, जीत चंद्रा, तर महिला एकेरीत अंजली रोहिल्ला व पात्रता फेरीतून आलेल्या नित्या मणी या भारतीय खेळाडूंना पराभवाचा सामना करावा लागला.