पणजी: राज्‍य सरकारने गोवा शॅक धोरण २०२३-२६ ला आणखी एका पर्यटन हंगामासाठी, म्हणजेच २०२६-२७ साठी मुदतवाढ दिली आहे. पर्यटन विभागाने ९ सप्टेंबर रोजी जारी केलेली अधिसूचना गुरुवारी राजपत्रात प्रसिद्ध झाली. विद्यमान धोरणात किरकोळ बदल आणि काही अतिरिक्त अटींचा समावेश करण्यात आला आहे.

या धोरणानुसार, समुद्रकिनाऱ्यांवर तात्पुरते शॅक्‍स, डेक बेड, छत्र्या, टेबल, खुर्च्या आदी उभारण्यास परवाने दिले जातील. पर्यटन हंगाम १ सप्टेंबर ते ३१ मे असा असून, १० जूनपर्यंत शॅक्‍स हटवून जागा पूर्ववत करणे बंधनकारक आहे. शॅक्‍सची कमाल लांबी १८ मीटर, रुंदी ८ मीटर आणि उंची ५.५ मीटर असेल. सांतावाड्डो किनाऱ्यावरील प्रवेशाजवळील पहिल्या चार शॅक्‍ससाठी लांबीची मर्यादा १२ मीटर आहे.

शॅक्‍सधारकांना कामकाजाच्या वेळेत सीसीटीव्ही सुरू ठेवून ३० दिवसांचे चित्रण जतन करावे लागेल. कर्मचाऱ्यांची पोलिस पडताळणी, गणवेश व पर्यटन विभागाचे ओळखपत्र आवश्यक आहे.

कासवांच्या किनाऱ्यांवर निर्बंध

कासवांच्या अंडी घालण्याची ठिकाणे असलेल्या समुद्रकिनाऱ्यांवर सायंकाळी ६ नंतर शॅक्‍सचे कामकाज, डेक बेडची मांडणी, बाहेरील कृत्रिम प्रकाश आणि मोठ्या आवाजातील संगीतावर निर्बंध राहतील. प्रत्येक नियमभंगासाठी एक लाख रुपयांची भरपाई आकारण्याची तरतूद आहे.

२० लाखांपर्यंत होऊ शकतो दंड

अनधिकृत डेक बेड, खुर्ची, टेबल किंवा छत्रीसाठी प्रत्येक वस्तूमागे ५ हजार रुपये दंड व जप्ती होईल. शॅक्‍स भाड्याने किंवा उपभाड्याने दिल्यास २० लाख रुपये दंड, सुरक्षा ठेव जप्त, परवाना रद्द आणि शॅक्‍स हटविण्याची कारवाई होऊ शकते. गंभीर नियमभंग करणाऱ्यांना काळ्या यादीत टाकण्याचीही तरतूद आहे.