पणजी : आगामी २०२६-२७ या शैक्षणिक वर्षात इयत्ता पहिली ते पाचवी आणि अकरावीचे वर्ग ६ जून २०२६ पासून सुरू होतील. तर, सहावी ते दहावी आणि बारावीसाठी पहिली टर्म १ एप्रिल ते १० ऑक्‍टोबर आणि दुसरी टर्म १२ ऑक्‍टोबर ते २४ मार्च अशी असेल. शिक्षण संचालक शैलेश झिंगडे यांनी आगामी वर्षातील वेळापत्रक आणि सुट्ट्या जाहीर करत, त्‍यासंदर्भातील आदेश जारी केले आहेत.

आदेशानुसार, प्राथमिक, माध्यमिक आणि उच्च माध्यमिक शाळांसाठी संपूर्ण शैक्षणिक वर्षात एकूण कामकाजाचे दिवस २२० पेक्षा कमी नसावेत, तर प्रत्यक्ष अध्यापनाचे दिवस किमान २०० असणे अनिवार्य असतील.

दररोज किमान साडेपाच तास अध्‍यापन

दररोज किमान साडेपाच तास अध्‍यापन असावे, पहिली सत्र परीक्षा १० ऑक्टोबरपर्यंत पूर्ण करावी तर दुसरी सत्र परीक्षा १३ मार्च २०२७ पर्यंत घेऊन अंतिम परीक्षेचा निकाल ३१ मार्च २०२७ नंतर जाहीर करावा, असेही आदेशात नमूद करण्‍यात आले आहे.

अशा असतील सुट्ट्या

गणेश चतुर्थी :

१४ ते १९ सप्टेंबर

दिवाळी : २ ते २१ नोव्हेंबर

नाताळ : २४ डिसेंबर ते २ जानेवारी २०२७

उन्हाळी सुट्टी :

१ मे ते ५ जून २०२७.

शिवाय १० स्वेच्छा सुट्ट्या देण्याची मुभा.

पैकी ४ सुट्ट्या चतुर्थीसाठी, उर्वरित ६ चर्चा करून ठरवणार

शिक्षक, विद्यार्थ्यांना नियोजनाचे आवाहन

शिक्षण संचालनालयाने स्‍पष्‍ट केले आहे की, हे वेळापत्रक गोव्‍यातील सर्व सरकारी व अनुदानित शाळांसाठी लागू राहणार आहे. शाळा व्‍यवस्‍थापन, शिक्षक, विद्यार्थी आणि पालकांनी या वेळापत्रकाची नोंद घेऊन आपापले नियोजन करावे. त्‍यामुळे त्‍यांना पुढील दिशा ठरविणे सुलभ होईल. साहजिकच त्‍यांचा वेळ वाचेल.