डिचोली: डिचोली तालुक्यातील सर्वण कोमुनिदादची जमीन परस्पर विकण्याचा प्रकार घडला असून या गैरव्यवहारातून मोठा आर्थिक घोटाळा झाला आहे, अशी धक्कादायक माहिती समोर आली आहे. तसा संशयही गावकऱ्यांकडून व्यक्त करण्यात आला आहे. हा घोटाळा उघड झाल्याने सर्वण गावात सध्या खळबळ माजली असून सध्या हे घोटाळ्याचे प्रकरण गावात खदखदू लागले आहे.

या घोटाळ्याची ‘भांडाफोड’ करण्यासाठी कोमुनिदादचे सदस्य असलेले सावंत गावकरी आता संघटित झाले असून, ते आक्रमक बनले आहेत. गावकऱ्यांना अंधारात ठेवून कोमुनिदाद मंडळाच्या काही पदाधिकऱ्यांनी कोमुनिदादची जमीन बेकायदेशीरपणे विकली असून, या घोटाळ्यात एक स्थानिक वकीलही सामील आहे. असा संशय आहे. तशी चर्चाही सध्या गावात चालू आहे. सर्वण येथील सर्वे नं. १९/२ ही कोमुनिदादशी संबंधीत सुमारे २५ हजार चौरस मीटर जमीन दिल्लीस्थित एका बड्या बिल्डरला बेकायदेशीरपणे विकल्याची माहिती उघड झाली आहे.

हा गैरव्यवहार उघड होताच, कोमुनिदादची बैठक घ्यावी, अशी बहुतांश गावकऱ्यांनी निवेदनाद्वारे मागणी करुनही कोमुनिदाद मंडळाकडून अद्याप कोणताही प्रतिसाद देण्यात आलेला नाही. उलट या आर्थिक घोटाळ्यात ज्यांची नावे पुढे आली आहेत, ते गप्पच आहेत, अशी माहिती ग्रामस्थांनी दिली. कोमुनिदादची जमिन बळकावण्याच्या प्रकाराबाबात ग्रामस्थांनी आज बैठकीत विविध शक्यतावर चर्चा करण्या आली.

देवाला गाऱ्हाणे घालण्‍याचा निर्णय

या आर्थिक घोटाळ्याच्या पार्श्वभूमीवर काल (सोमवारी) रात्री उशिरा सर्वण कोमुनिदादशी संबंधित गावकऱ्यांची एक महत्त्वाची बैठक श्री श्यामपुरुष मंदिरात घेण्यात आली. या बैठकीस पन्नासहून अधिक गावकरी उपस्थित होते. कोमुनिदादीच्या घोटाळ्या प्रकरणी पुढील कृती करण्यापूर्वी देवासमोर गाऱ्हाणे घालण्याचा निर्णयही या बैठकीत घेण्यात आला. या निर्णयाला उपस्थित सर्व गावकऱ्यांनी सहमती दिली. घोटाळ्यामागील प्रमुख सूत्रधार म्हणून ज्यांच्याकडे गावकरी अंगुलीनिर्देश करतात. त्यांना बोलावून देखील ते या बैठकीला मात्र उपस्थित राहिले नाहीत.