Goa Crime: दागिने पॉलिश करण्यासाठी घरात घुसलेल्या बिहारच्या दोघा तरुणांना जमावाने साळगावमध्ये पकडून बेदम चोप दिला. दागिने पॉलिश करण्याच्या इराद्याने फसवणूक करण्याचा या तरुणांचा डाव होता, असा आरोप स्थानिकांनी केला. या घटनेचा व्हिडिओ बुधवारी (ता.१६) सोशल मीडियावर व्हायरल झाला. मात्र, सायंकाळी उशिरापर्यंत पोलिस स्थानकात तक्रार दाखल झाली नव्हती.
मोहम्मद एजाज आणि सत्तार (दोघेही रा. बिहार) हे दोन तरुण साळगाव येथे कायतान यांच्या घरात शिरले. यावेळी कायतान यांची वृद्ध आई एकटीच होती. हीच संधी हेरून या तरुणांनी तिला दागिने पॉलिश करून देतो, असे सांगितल्यानंतर वृद्धेने सोनसाखळी त्यांना दिली. तेव्हा अचानक कायतान घरी परतले असता, त्यांनी दोघांना घराबाहेर काढले.
मारहाणीचा व्हिडिओ व्हायरल
त्यांच्या बोलण्यात संदिग्धता दिसून आल्याने संतप्त जमावाने दोघांना बेदम चोप दिला आणि या घटनेचा व्हिडिओ काढून तो सोशल मीडियावर पोस्ट केला.
या व्हिडिओच्या माध्यमातून अशा भामट्यांना घरात प्रवेश देऊ नका, दागिने पॉलिश करण्याच्या नावाने लोकांची फसवणूक करणारी टोळी राज्यात सक्रिय असल्याचा संदेश या लोकांनी दिला. मात्र, याप्रकरणी सायंकाळपर्यंत कोणतीही तक्रार पोलिसांत दाखल झाली नव्हती.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.