Road Accident राज्यात अपघातांचे सत्र सुरूच असून ते काही कमी होण्याचे चिन्ह दिसत नाही. यात रेंट – ए – कार आणि रेंट – ए – बाईक यांच्यामुळे होणाऱ्या अपघातांच्या संख्येत वाढ होत आहे. याची प्रचिती आज आगशी बगलमार्गावर आली.

भरधाव येणाऱ्या रेंट – ए – कारने दुचाकीला धडक दिल्याने दुचाकीचालक वीरेश सिलीमखान (पणजी) हा जखमी झाला आहे. आगशी पोलिसांनी वाहनचालक हेमंत यादव (दिल्ली) याच्या विरोधात निष्काळजीपणे वाहन चालवल्याप्रकरणी गुन्हा नोंद केला आहे.

हा अपघात आज सकाळी ८.३० वा. झाला. वेर्णा येथे कामावर जात असलेल्या वीरेश सिलीमखानच्या दुचाकीला मागून येणाऱ्या रेंट – ए – कारने (क्र. जीए - ०८ - व्ही - २६९८) जोरदार धडक दिल्यानंतर तो उसळून खाली पडला. सिलीमखानला पायाला आणि हाताला दुखापत झाली

असून त्याला १०८ रुग्णवाहिकेत उपचारासाठी गोमेकॉत पाठवण्यात आले आहे. अपघाताची माहिती मिळताच आगशी पोलिसांनी घटनास्थळी येऊन पंचनामा केला. रेंट-अ-कारचे वाहनचालक हेमंत यादव याची मद्यपानासंबंधीची वैद्यकीय चाचणी केली आहे.

पोलिसांनी यादवला ताब्यात घेतले असून भादंसच्या कलम २७९ आणि २३८ अंतर्गत गुन्हा नोंद केला आहे. मद्यपान केले की नाही याचा चाचणी अहवाल पाच ते सहा दिवसांत येणार आहे, अशी माहिती आगशी पोलिस ठाण्यातील पोलिस उपनिरीक्षक नारायण पिंगे यांनी दिली.

महिलेचा जमावाबरोबर वाद

रेंट – ए - कारमधील चालक आणि महिलेने अपघातानंतर जमा झालेल्या जमावासोबत वाद घातला. चालक मद्यधुंद असल्याची संशय स्थानिकांना आल्यानंतर हा वाद सुरू झाला. अपघातानंतर मोठ्या प्रमाणावर जमाव घटनास्थळी जमा झाला, त्यानंतर कारमधील महिलेने जमावाशी वाद घालण्यास सुरवात केली.

घटनेचा एक व्हिडिओ सध्या समाज माध्यमांवर व्हायरल होताना दिसत आहे. अपघातानंतर महिलेने स्थानिकांशी वाद घातला तसेच, त्यांनाच दोष दिला. यावेळी तिच्यासोबत असणाऱ्या पुरुषाने तिला सांभाळत माघारी नेत असताना व्हिडियोत दिसते.