पणजी: बंगालच्या उपसागरात निर्माण झालेल्या कमी दाबाच्या पट्ट्यामुळे राज्यातील अनेक भागांत पावसाने पुन्हा हजेरी लावली. सत्तरी, डिचोली, पेडणे, धारबांदोडा यांसह विविध भागांत पावसाची नोंद झाली.

गुरुवारी राज्यातील काही भागांत ताशी ३० ते ४० किलोमीटर वेगाने वारे वाहण्यासह पावसाची शक्यता असल्याने हवामान खात्याने यलो अलर्ट जारी केला आहे. राजधानी पणजीत सकाळी ढग दाटून आले होते. सकाळी ११ वाजण्याच्या सुमारास येथे तुरळक पावसाचा शिडकावा झाला.

मागील आठ दिवसांपासून पाऊस नसल्याने शेतकरी चिंतेत होते. विशेषतः भातशेतीवर त्याचा परिणाम होण्याची शक्यता निर्माण झाली होती. मात्र, काही भागांत झालेल्या पावसामुळे शेतीवरील संकट काही प्रमाणात दूर झाले आहे.

मागील २४ तासांत राज्यात सरासरी २९.९ मिमी (१.१७ इंच) पावसाची नोंद झाली. आतापर्यंत राज्यात ७९.१७ इंच पाऊस झाला असून, सरासरीच्या तुलनेत सुमारे ३१.७ टक्के तूट आहे. दाबोळीत ३.८ इंच, मुरगाव ३.५५ इंच, काणकोण ३ इंच, मडगाव ३.१४ इंच आणि पणजीत १.५१ इंच पावसाची नोंद झाली.