पणजी: गोव्याचे माजी रणजी क्रिकेटपटू चंद्रशेखर (चंद्रा) तेंडुलकर (Chandra Tendulkar) यांनी गोवा संघाच्या प्रशिक्षकपदासाठी (Coach Of Goa Team) अर्ज केला आहे. गोव्यातील क्रिकेटने आपल्याला भरपूर संधी दिली, आता परतफेड करण्याची ही योग्य आणि चांगली वेळ आहे, क्रिकेटमधील अनुभवाचा लाभ करून देताना गोव्याच्या रणजी संघाला नव्या उंचीवर नेण्याचे लक्ष्य बाळगून प्रशिक्षकपदासाठी अर्ज केला आहे, असे तेंडुलकर यांनी सांगितले.

गोमंतकीय क्रिकेटमध्ये सुमारे चार दशके कार्यरत असलेले झुआरीनगर येथील तेंडुलकर हे गोव्याच्या पहिल्या रणजी क्रिकेट संघाचे सदस्य होते. याशिवाय गोव्याचे 19, 22, 25 वर्षांखालील संघाचेही त्यांनी प्रतिनिधित्व केले आहे. 1985-86 मोसमात त्यांनी कर्नाटकविरुद्ध भद्रावती येथे रणजी क्रिकेटमध्ये पदार्पण केले. ते सलामीचे फलंदाज होते. गोव्याचा तो रणजी क्रिकेट स्पर्धेतील पहिलाच मोसम होता. ते गोव्याच्या व्हेटरन्स क्रिकेट संघाचे कर्णधार आहेत.

प्रशिक्षकपदासाठी चुरस

गोव्याच्या रणजी क्रिकेट प्रशिक्षकसाठी दिल्लीचे माजी फलंदाज भास्कर पिल्लई, ऑस्ट्रेलियाचे माजी कसोटीपटू शेन टेट, मुंबईचे माजी रणजीपटू सुलक्षण कुलकर्णी व संदीप दहाड, कर्नाटकचे माजी रणजीपटू मन्सूर अली खान आदींनी अर्ज केले आहेत. रणजी संघ प्रशिक्षक ठरविण्यासाठी गोवा क्रिकेट असोसिएशनच्या समितीची नुकतीच बैठक झाली होती, लवकरच प्रशिक्षक नियुक्तीवर शिक्कामोर्तब होणार आहे.