बेकायदेशीर बांधकामाचा अहवाल द्या, मीराबाग आंदोलकांची मागणी; जलसंपदा कार्यालयावर नेला मोर्चा

सांगे: मीराबाग येथील प्रस्तावित बंधाऱ्याविरोधातील आंदोलनाने शुक्रवारी १८वा दिवस गाठला. संतप्त ग्रामस्थांनी पाजीमळ, सांगे येथील जलसंपदा खात्याच्या कार्यालयावर मोर्चा काढून बेकायदेशीर बांधकामाचा सविस्तर अहवाल तातडीने सादर करण्याची मागणी केली.

दोन वर्षांपूर्वी खोदलेला खड्डा तसेच सध्या सुरू असलेले नवीन खोदकाम त्वरित बुजविण्याची मागणीही त्यांनी अधिकाऱ्यांकडे केली. अखेर लेखी हमी मिळाल्यानंतर आंदोलक माघारी परतले.

काय म्हणाले आंदोलक..

आंदोलनाचे नेते संकेत भंडारी म्हणाले, सरकारने बंधारा रद्द केल्याचे लेखी स्वरूपात देणे भाग आहे. आम्ही माघार घेणार नाही. नगरसेवक मेशू डिकॉस्ता यांनी सांगितले, मीराबाग येथे बंधारा उभारल्यास सांगेतील देव श्री संगमेश्वर मंदिर परिसर पाण्याखाली जाण्याची भीती आहे.