पणजी: देशाचे पंतप्रधान नरेंद्र मोदींचा वाढदिवस सर्वत्र उत्साहात साजरा केला जात आहे. मोदींवर देश विदेशातून शुभेच्छांचा वर्षाव होत आहे. गोव्यात मात्र अनोख्या पद्धतीने मोदींचा वाढदिवस साजरा करत त्यांना वाढदिनी अमूल्य भेट देण्यात आलीय.

गोव्याचे राज्यपाल पी एस श्रीधरन पिल्लई यांनी मंगळवारी पंतप्रधान मोदी यांच्या वाढदिवसानिमित्त गोव्यातील प्राचीन वृक्षांचे जतन करण्याच्या उद्देशाने एक उपक्रम सुरू केला.

गोवा राजभवन येथे मुख्यमंत्री प्रमोद सावंत आणि इतर मान्यवरांच्या उपस्थितीत "प्राचीन वृक्ष आयुर्वेदिक चिकीत्सा" उपक्रमाचा शुभारंभ करण्यात आला.

उपक्रमाचा शुभारंभ करण्यापूर्वी राज्यपालांनी मोदींच्या वाढदिवसानिमित्त विविध मंदिर आणि चर्चमध्ये प्रार्थना केली.

राज्याच्या कल्याणासाठी प्राचीन वृक्षांचे संरक्षण महत्त्वपूर्ण आहे आणि समाजाने आगामी पिढीसाठी वृक्षांचे संरक्षण केले पाहिजे, असे राज्यपाल म्हणाले.

मुख्यमंत्र्यांनी वारसा वृक्षांचे संरक्षण आणि जतन करण्यासाठी राज्यपाल करत असलेल्या प्रयत्नांचे कौतुक केले, तसेच नागरिकांनी या कार्यात सामील होण्याचे आवाहन केले.

"प्राचीन वृक्ष आयुर्वेदिक चिकीत्सा' नावाच्या या अनोख्या उपक्रमाच्या उद्घाटनात सामील होताना आनंद होत असल्याचे मुख्यमंत्री सावंत म्हणाले.

कोट्टक्कल आर्य वैद्य साला, केरळचे डॉ. पी.एम. वरियर (व्यवस्थापकीय विश्वस्त) आणि कोईम्बतूर आर्य वैद्य फार्मसीचे देवीदास वारियर (व्यवस्थापकीय संचालक) हे देखील यावेळी उपस्थित होते.