Goa Fire Services : राज्यात मागील दोन-चार दिवसांपासून पावसाची तीव्रता वाढली आहे, त्यामुळे पावसामुळे झाडे कोसळणे, दरड कोसळणे असे प्रकार वाढले असून मागील दोन-चार दिवसांत या प्रकारांमुळे अग्निशमन दलाला हवामान, पावसामुळे होणाऱ्या अपघातांसंबंधी येणाऱ्या आपत्कालीन कॉल्सच्या संख्येत वाढ झाली आहे.

मागील पंधरा दिवसांत आग लागणे, आपत्कालीन परिस्थिती आणि हवामानसंबंधी घटना आदींपासून ३१ लाख ५३ हजार ५०० रुपयांच्या मालमत्तेचे नुकसान झाले तर १ कोटी ८७ लाख ५० हजार रुपयांची मालमत्ता वाचविण्यात अग्निशमन दलाला यश आले आहे. मागील पंधरा दिवसांत पावसामुळे निर्माण झालेल्या स्थितीतून २ नागरिकांना वाचविण्यात आले.

मागील पंधरा दिवसांत अग्निशमन दलाला एकूण ३८६ कॉल्स आले. त्यापैकी तब्बल २७३ कॉल्स हे केवळ पावसामुळे झालेल्या पडझडीसंबंधी होते. उर्वरित २५ कॉल्स हे आगीच्या घटना, आपत्कालीन स्थितीसंबंधी- ८३, जिओफिसिकल- २, हायड्रोलॉजिकल- २ आणि इतर- १ अशी संख्या आहे.

मागील पंधरा दिवसांत आलेल्या कॉल्सच्या तुलनेत मागील तीन-चार दिवसांतच कॉल्सची संख्या अधिक वाढली आहे. १३ जून ते १५ जूनदरम्यान सर्वाधिक १७४ कॉल्स आले आहेत, त्यातील बहुतांशी कॉल्स हे पावसामुळे झालेल्या पडझड, झाड कोसळणे आदींचे आहेत.

अग्निशमनला आलेले कॉल्स

तारीख एकूण कॉल्स

१ ते ३ जून ५१

४ ते ६ जून ६३

७ ते ९ जून ३७

१० ते १२ जून ६१

१३ ते १५ जून १७४