Goa Weather Update: ऑक्टोबर महिना संपत आला तरीही गोव्यात सध्या जोरदार पाऊस कोसळत असून, त्याचा फटका जनजीवनाला बसला आहे. विशेषतः बुधवारी डिचोली येथील आठवडी बाजार पूर्णपणे विस्कळीत झाला आहे. मुसळधार पावसामुळे बाजारात मोठ्या प्रमाणात पाणी साचले आणि विक्रेत्यांचे तसेच खरेदीसाठी आलेल्या नागरिकांचे मोठे नुकसान झाले. या पावसामुळे डिचोली परिसरातील दैनंदिन व्यवहारांवर मोठा परिणाम झाला आहे.

सालेलीत घराचे छत कोसळले

जोरदार पावसाचा आणखी एक फटका सत्तरी तालुक्यातील सालेली या गावात बसला आहे. बोडनवाडा येथील राजाराम नारायण गावकर यांच्या घराचे छत मुसळधार पावसामुळे कोसळले. या घटनेत घराचे मोठे नुकसान झाले असले तरी, सुदैवाने कोणतीही जीवितहानी झालेली नाही. या घटनेबद्दल अधिक तपशील प्रतीक्षेत आहेत.

हवामान विभागाकडून 'यलो अलर्ट' जारी

भारतीय हवामान विभाग (IMD), गोवा यांनी पुढील काही तासांसाठी गोव्यात 'यलो अलर्ट' (Yellow Alert) जारी केला आहे. अरबी समुद्रातून ढग गोव्याच्या दिशेने येत असल्यामुळे, पुढील ३ तासांदरम्यान उत्तर गोवा आणि दक्षिण गोव्यातील काही ठिकाणी हलका ते मध्यम स्वरूपाचा पाऊस होण्याची शक्यता आहे.

हवामान विभागाने या काळात वादळी वारे (३०-४० किमी प्रतितास, ५० किमी प्रतितास वेगाने वाहण्याची शक्यता), विजांचा कडकडाट आणि मेघगर्जना होण्याची शक्यता वर्तवली आहे. नागरिकांनी आणि विशेषतः किनारी भागात राहणाऱ्या लोकांनी या काळात आवश्यक ती काळजी घ्यावी, असे आवाहन करण्यात येत आहे.

गोव्यात सध्या जो मान्सूनोत्तर पाऊस पडत आहे, त्यासाठी दोन प्रमुख हवामान प्रणाली कारणीभूत आहेत, अशी माहिती भारतीय हवामान विभाग (IMD), गोव्याचे शास्त्रज्ञ नहुष कुलकर्णी यांनी दिली आहे. साधारणपणे जून ते सप्टेंबर या काळात मान्सूनचा पाऊस असतो, तर त्यानंतर येणारा पाऊस हा गडगडाटासह विशिष्ट भागांत पडतो. या ऑक्टोबरमध्ये गोव्यात पाऊस पडण्याची मुख्य कारणे:

• चक्रवात मोंथा (Cyclone Montha): या चक्रीवादळाचा अप्रत्यक्ष परिणाम.

• अरबी समुद्रातील कमी दाबाचे क्षेत्र (Depression in the Arabian Sea): या दोन्ही यंत्रणांच्या एकत्रित परिणामामुळे राज्यात पावसाची तीव्रता वाढली आहे.