Goa Rain: परतीच्या पावसाने गोव्याला चांगलेच झोडपून काढले आहे. गेल्या २४ तासांहून अधिक काळ राज्यात पाऊस कोसळत आहे. या तुफान पावसाने राज्यात हाहाकार माजवला आहे. अनेक ठिकाणी रस्ते पाण्याखाली गेले आहेत, समुद्राला, नद्यांना उधाण आले आहे.

परिणामी नद्यांवर असलेल्या फेरी बोटींच्या धक्क्यांवरही पाणी आले आहे. त्याचा फटका वाहनधारकांना बसत आहे.

रविवारी सकाळी रायबंदर येथील चोडण फेरी धक्क्यावर पाणी आले. चोडण बंदराकडे जाण्यासाठी येथे फेरी बोटी लागतात. तथापि, पाणी पातळीत वाढ आणि तुफान पाऊस यामुळे या परिसरात पाणी साचले आहे.

त्यामुळे फेरीतून बाहेर पडताना वाहनधारक आणि इतर प्रवाशांना गुडघ्याभर पाण्यातूनच वाट काढत जावे लागत आहे. त्यामुळे वाहनधारकांची कसरत होत आहे.

फेरीबोट धक्क्याला लागल्यानंतर पासून तिथून मुख्य रस्त्यापर्यंत जाताना वाहनधारकांची तारांबळ उडत असल्याचे चित्र दिसून येत होते. सध्या धक्क्यावर बराचसा भाग पाण्याखाली गेला आहे. पावसाचा जोर असाच वाढल्यास पाणी पातळीत आणखी वाढ होऊ शकते.