पणजी: गोव्याच्या सार्वजनिक बांधकाम विभागात (PWD) सुमारे 1000 कोटींचा महाघोटाळा झाल्याचा खळबळजनक आरोप करण्यात आला. या प्रकरणामुळे संपूर्ण विभागात खळबळ उडाली असून वरिष्ठ अधिकारी आणि बड्या कंत्राटदार कंपन्यांचे धाबे दणाणले आहेत. कंत्राट मिळवण्यासाठी बनावट कागदपत्रांचा आधार घेतल्याच्या तक्रारीनंतर आता हे प्रकरण भ्रष्टाचार प्रतिबंधक विभागाकडे (ACB) पोहोचले.

स्थापत्य अभियंता आणि कंत्राटदार मनोज एस. पै डुकले यांनी या संदर्भात अधिकृत तक्रार दाखल केली. त्यांच्या दाव्यानुसार, 'बगकिया कन्स्ट्रक्शन्स प्रायव्हेट लिमिटेड' या कंपनीने कंत्राटदार श्रेणीत वरचे स्थान मिळवण्यासाठी कामाच्या पूर्ततेची खोटी प्रमाणपत्रे सादर केली. तसेच, 'जॉइंट व्हेंचर'च्या (JV) नोंदींमध्ये फेरफार करुन दिशाभूल करणारी माहिती दिली, असा आरोप डुकले यांनी केला. या बोगस कागदपत्रांच्या जोरावर कंपनीने कोट्यवधींच्या निविदा पदरात पाडून घेतल्याचा संशय व्यक्त केला जात आहे.

या तक्रारीत केवळ कंपनीलाच नव्हे, तर सार्वजनिक बांधकाम विभागाच्या अधिकाऱ्यांनाही आरोपीच्या पिंजऱ्यात उभे करण्यात आले. नियमावली स्पष्ट असतानाही अधिकाऱ्यांनी या कागदपत्रांची पडताळणी का केली नाही? असा प्रश्न उपस्थित केला जात आहे. हे प्रकरण आता दक्षता विभागाच्या (Vigilance) भ्रष्टाचार प्रतिबंधक शाखेकडे सोपवण्यात आले. दुसरीकडे, संबंधित कंपनीने आपल्यावरील सर्व आरोप फेटाळून लावले असून कोणत्याही चौकशीला सहकार्य करण्यास तयार असल्याचे म्हटले आहे.