पणजी : पावसाळ्यात पणजी शहराची झालेली दुरवस्था पाहता उत्पल पर्रीकर यांनी आमदार तथा मंत्री बाबूश मोन्सेरात आणि त्यांचे सुपुत्र तथा महापौर रोहित मोन्सेरात यांच्यावर जबरदस्त हल्लाबोल केला आहे. त्यांनी या दोघांचा ‘फादर-सन एन्टरप्रायझेस’ असा उल्लेख केला आहे. या एन्टरप्रायझेसचा कारभार पणजीला बरबाद करणार असल्याची टीका उत्पल यांनी केली आहे.

एका खासगी चॅनलला दिलेल्या मुलाखतीत उत्पल यांनी पणजी शहरातील रस्त्यांची अवस्था व साचणाऱ्या पाण्याची समस्येविषयी मत व्यक्त केले. पणजीत पाणी तुंबण्याच्या समस्येविषयी ते म्हणाले, मला संधी मिळाली असती तर दोन-तीन कल्पना होत्या, पण संधीच मिळाली नाही. ज्यांना लोकांनी संधी दिली, त्यांनी लोकांसाठी काही वेळ द्यावा.

सद्यस्थितीत कुठेच नेतृत्व दिसत नाही. जे निवडून आले, त्यांचा रस रिअल इस्टेटमध्ये आहे. त्यालाच ते अधिक किंमत देतात, असा टोला त्यांनी बाबूश मोन्सेरात यांचे नाव न घेता हाणला. त्याशिवाय मुख्यमंत्री सावंत यांनीही याप्रश्‍नी लक्ष घालणे अपेक्षित आहे, असे उत्पल यांना वाटते.

निवडणुका आल्या, की येतो डांबराचा वास

निवडणुका तोंडावर आल्या की, शहरात डांबराचा वास येतो. त्यामुळे त्याचा दर्जा काय असेल, हे सांगण्यास ज्योतिषाची गरज नाही. राजधानीची अवस्था सुधारण्यासाठी व पुढील पावसाळ्यात रस्त्यांवर पाणी साचू नये, याकरिता उपाय योजण्यासाठी मुख्यमंत्र्यांनी यात लक्ष घातले पाहिजे, असे मत उत्पल यांनी व्यक्त केले.

फादर-सन एन्टरप्रायझेस पाच वर्षे असेच काम करीत राहिल्यास पणजीला राजधानी म्हणणेसुद्धा लज्जास्पद वाटेल. पर्वरीत विधानसभा परिसर आहे, तो राजधानी म्हणून जाहीर करावा लागेल.

-उत्पल पर्रीकर