Goa Politics News: काँग्रेसमधून राजीनामा न देताच भाजपमध्ये प्रवेश केलेल्या आठ आमदारांविरोधातील अपात्रता याचिकेवरील सुनावणी सभापती रमेश तवडकर यांनी पूर्ण केली. २५ ऑक्टोबरपर्यंत ते निवाडा देणार आहेत.

ही याचिका काँग्रेसचे डॉमनिक नोरोन्हा यांनी सादर केली होती. या निवाड्यानंतर काँग्रेसचे माजी प्रदेशाध्यक्ष गिरीश चोडणकर यांच्या याचिकेवर सभापती सुनावणी सुरू करणार आहेत. आमदार कामत आणि लोबो यांना अपात्र ठरविण्याची याचिका काँग्रेस प्रदेशाध्यक्ष अमित पाटकर यांनी सादर केली होती.

चोडणकरांच्या याचिकेवर १० नोव्हेंबरला सुनावणी

मणिपूर प्रकरणात अपात्रतेच्या याचिकांवर सभापतींनी ९० दिवसांत निकाल देणे बंधनकारक असल्याचे सर्वोच्च न्यायालयाने म्हटले होते. त्याचा आधार घेत चोडणकर यांनी असाच आदेश गोव्याच्या सभापतींना द्यावा, अशी मागणी केली होती. त्यानंतर सर्वोच्च न्यायालयाने १० नोव्हेंबर २०२४ पर्यंत सभापती निकाल देतील, अशी अपेक्षा व्यक्त करत चोडणकर यांच्या याचिकेवरील पुढील सुनावणी १० नोव्हेंबरला ठेवली आहे.