पणजी (Goa Politics) : बार्देशमधील एका आमदाराचा भाजप प्रवेश निश्चित झाला असून दिल्लीच्या पक्षश्रेष्ठींनी आणि केंद्रीय गृहमंत्री अमित शहा (Amit Shah) यांनी या पक्षप्रवेशाला हिरवा कंदील दाखवला आहे. गेल्या काही दिवसांपासून ते भाजप (Goa BJP) नेत्यांच्या संपर्कात होते. गेल्या आठवड्यात कदंब पठारावरील हॉटेल हिल्टनमध्ये निवडणूक प्रभारी देवेंद्र फडणवीस, सी. टी. रवी यांच्याशी त्यांनी बोलणी केली होती. तत्पूर्वीही ते फडणवीस यांना भेटले होते.

या आमदाराने काँग्रेसमध्ये (Congress) प्रवेश करण्याचा प्रस्ताव पक्षाच्या नेत्यांसमोर ठेवला होता. त्यांच्या भावाला सांताक्रुझ मतदारसंघातून निवडणूक लढवायची होती. काँग्रेसने हा प्रस्ताव गेल्या पंधरा दिवसांपासून लोंबकळत ठेवल्याने आणि सांताक्रुझ मतदारसंघात उमेदवारी रुडाल्फ फर्नांडिस यांना मिळणार असल्याचे स्पष्ट झाल्याने या बंधूंनी आपला पवित्रा बदलला आहे. काँग्रेस सध्या अनिर्णित गर्तेत अडकली असून गुरुवारी या आमदाराच्या भावाने आपल्याला निवडणूक लढवण्यामध्ये इंटरेस्ट नसल्याचे जाहीर केले होते. परंतु दुसरीकडे त्यांची भाजपबरोबरची बोलणी निर्णायक पातळीवर पोहोचली होती.विधानसभा निवडणुका जसजशा जवळ येऊ लागल्या आहेत, तसतसे पक्षांतर आणि राजकीय उलथापालथी वेगाने वाढत आहेत.

वैचारिक ध्येयधोरण आणि नैतिकता यांना तिलांजली दिली जात असल्याचे दिसत आहे. त्यामुळे आज या पक्षात असणारे नेते उद्या दुसऱ्या पक्षात दिसत आहेत.

मुक्ती दिनापूर्वी गोव्यात राजकीय स्फोट

भाजपच्या एका ज्येष्ठ सदस्याने या आमदाराच्या भाजप प्रवेशाला दिल्लीश्रेष्ठींची मान्यता मिळाल्याची माहिती दिली असून ते म्हणाले, की प्रवेशाचा मुहूर्त ठरलेला नाही. मात्र, पुढील 10 ते 12 दिवसांमध्ये ही प्रक्रिया पूर्ण होईल. मात्र, तत्पूर्वी त्यांना आमदारकीचा राजीनामा देऊनच भाजपमध्ये प्रवेश करावा लागणार आहे. गोवा मुक्ती दिनाच्या कार्यक्रमासाठी पंतप्रधान नरेंद्र मोदी 19 डिसेंबर रोजी गोव्यात येत असून तत्पूर्वी गोव्यात राजकीय स्फोट घडवण्याची तयारी भाजपने सुरू केली आहे. या आमदाराचा भाजपप्रवेश हाही त्याचाच एक भाग असेल.