पणजी : गोव्याची विधानसभा निवडणूक (Goa Politics) जसजशी जवळ येत आहे, तसतशी आरोप प्रत्यारोपांच्या फैरीही झडू लागल्या आहेत. यातच गोवा सुराज पक्षाने पत्रकार परिषद घेऊन सर्वच राजकीय विरोधकांचा समाचार घेतला आहे.

गोव्यात (Goa) बाहेरच्या पक्षांनी येऊ नये. बाहेरील पक्ष गोव्यात येऊन गोमंतकीयांची बदनामी करतात आणि त्याला सत्ताधारी भाजप नेते काहीही बोलत नाही याचाच अर्थ आम आदमी पार्टी भाजपची बी टीम आहे, असा गंभीर आरोप मनोज परब यांनी केला आहे.

गोव्यात विधानसभा निवडणुकीच्या (Goa Assembly Election) रिंगणात डेरेदाखल झालेल्या आम आदमी पार्टी (AAP) आणि तृणमूल काँग्रेसवर (TMC) गोवा सुराज पक्षाच्या मनोज परब यांनी सडकून टीका केली आहे.

कोणताही पक्ष किंवा संघटना ही पैशाशिवाय चालत नाही, मग आम आदमी पक्ष देणग्या न घेता कोणत्या पैशावर पक्ष चालवते असा खडा सवाल त्यांनी केजरीवाल यांना विचारला आहे.

गोव्याच्या विकासासाठी कुठल्याही पक्षाने आपला अजेंडा मांडलेला नाही, जो गोवा सुराज पक्षाने मांडला आहे. आम्ही फक्त बोलून नाही, तर करुनही दाखवणार आहोत, असा दावाही यावेळी मनोज परब यांनी केला. आम आदमी पार्टी गोव्यात भ्रष्टाचारमुक्त सरकार स्थापन करण्याची घोषणा करते, मात्र एलिना सालढाणा, दयानंद नार्वेकर यांच्यासारख्या भ्रष्ट नेत्यांना प्रवेश देणारे आम आदमी पार्टी भ्रष्टाचारविरोधी कशी? असा सवालही मनोज परब यांनी विचारला.