पणजी: गोव्यात वाढणाऱ्या गुन्ह्यांवर आळा बसवण्यासाठी गोवा पोलिसांनी आता डिजिटल तंत्राची मदत घेण्याची योजना आखली आहे. राज्यात येणाऱ्या भाडेकरू, पर्यटक आणि कामगार यांची पडताळणी करण्यासाठी आता गोवा पोलीस एक ॲप तयार करत आहेत. या नवीन ॲपच्या मदतीने पोलिसांना बाहेरून आलेल्या लोकांची ओळख पडताळणी करणं सोपं जाईल आणि परिणामी वाढणाऱ्या गुन्ह्यांवर आळा बसवायला मदत मिळेल.

क्रिमिनल रेकॉर्ड तपासण्यासाठी आणि व्हिसा ओव्हरस्टे व्हेरिफिकेशन्ससह रिअल-टाइम ओळख पटण्यासाठी हा ॲप सरकारी डेटाबेजचा वापर करेल.

यामुळे गोव्यातील भाडेकरूंची ओळख पटण्यास तसेच त्यांची पडताळणी करण्यास खोलीच्या मालकाला मदत मिळेल. या ॲपमुळे व्यक्तींची नोंदणी आणि पडताळणी करणे सोपे होईल.

हा ॲप केवळ गोव्याबाहेरून आलेल्या लोकांची पडताळणी करण्यातच नाही तर आपत्कालीन सूचना देण्यात सुद्धा मदत करणार आहे. गोव्यात येणाऱ्या लोकांचे आधार कार्ड, पॅन कार्ड आणि पासपोर्ट रेकॉर्ड सारखा केंद्र सरकारचा डेटाबेस ॲपसोबत लिंक केले जाणार असल्याने व्यक्तीची खरी ओळख पटायला मदत मिळेल आणि पर्यटक तसेच स्थानिक यांची सुरक्षा निश्चित करण्यात गोवा पोलिसांना मदत मिळणार आहे.