Goa Police Crime News: गोवा विद्यापीठातील विद्यार्थिनीचा पोलिस अधिकाऱ्याने विनयभंग केल्याचे कथित प्रकरण ताजे असतानाच आता आयआरबी पोलिसाने महिलेचाच पाठलाग केल्याचे प्रकरण समोर आले आहे. संबंधित पोलिस कॉन्स्टेबलने एका महिलेचा पाठलाग केला. तिच्यासह तिच्या पतीला त्याने धमक्याही दिल्याची घटना समोर आली आहे.

सूरज शैलेंद्र सक्सेना (रा. चिंबल, तिसवाडी) असे या पोलिस कॉन्स्टेबलचे नाव आहे. म्हापसा पोलिसांत याबाबत संबंधित महिलेने तक्रार दाखल केल्याचे समजते. या तक्रारीनंतर 28 वर्षीय विवाहितेचा विनयभंग करून तिला व तिच्या पतीला शिवीगाळ करीत धमकी दिल्याप्रकरणी म्हापसा पोलिसांनी दोघांवर गुन्हा दाखल केला आहे.

संबंधित पोलिस कॉन्स्टेबल सक्सेनाचा एक साथीदार या प्रकरणात फरार झाला आहे. त्याचाही शोध घेतला जात आहे. प्राप्त माहितीनुसार ही घटना 1सप्टेंबरला पोंबुर्फामध्ये घडली होती. वैयक्तिक संपर्क वाढविण्याच्या हेतूने संशयित सुरजने तक्रारदार पीडित विवाहितेचा पाठलाग करून तिचा विनयभंग केला.

तसेच घटनास्थळी संशयिताने पीडिता व तिच्या पतीला शिवीगाळ करून धमकी दिली. या प्रकरणी पीडितेने पोलिसांत तक्रार दिल्यानंतर म्हापसा पोलिसांनी संशयित व त्याचा मित्र बपीत नाईक याच्यावर गुन्हा नोंदविला आहे.

दरम्यान, ज्या पोलिसांनी संरक्षण करायचे, त्यांच्याकडून महिलांबाबत असे प्रकार घडत असल्यावरून आता राज्यातील पोलिस दलाविषयी तीव्र नाराजी व्यक्त होत आहे.