Goa Night Club: गेल्या काही दिवसांपासून राज्यात चालणाऱ्या बेकायदेशीर नाईटक्लबचा मुद्दा गाजत होता. सरकारने पोलीस आणि संबंधित खात्याला या प्रकरणी कडक कारवाईचे आदेशही दिले होते.

याच आदेशाच्या अनुषंगाने कलेक्टर, प्रदूषण नियंत्रण मंडळ आणि पोलिसांनी कळंगुट- बार्देश येथे बेकायदेशीरपणे चालणारे 11 नाईट क्लब बंद केले आहेत. गुरुवारी रात्री 10 च्या सुमारास ही धडक कारवाई करण्यात आल्याची माहिती मिळतेय.

या धडक कारवाईत सीलबंद केलेल्या नाइटक्लबची यादी:

1. नॉर्म्स पब

2. शील्ड/नेक्स्ट लेव्हल

3. मेहफिल

4. डेव्हिल्स क्लब

5. थ्री किंग

6. 39 स्टेप्स

7. पॉश नोश

8. ब्लॅक हार्ट

9. ट्रॉपिकल 24*7

10.कोड्ढा

11.प्लांटेशन लीफ रेस्ट

गोवा राज्य प्रदूषण नियंत्रण मंडळाच्या आदेश क्रमांक 1/25/23-DCB/Tech/2069 चे अनुसरण करून ही कारवाई करण्यात आलीय. सार्वजनिक सुरक्षा, सुव्यवस्था आणि नियमांची अंमलबजावणी करण्यासाठी सरकारकडून ही कारवाई केल्याचे समजतेय.

कळंगुट -बागा-वागातोर- हणजूण सारख्या किनारी भागात चालणाऱ्या नाइटक्लब, डान्सबार व मसाज पार्लरच्या नावाखाली अंमली पदार्थ, वेश्याव्यवसाय इतर बेकायदेशीर कृत्यांमध्ये वाढ होऊन यापरिसराचे नाव बदनाम होत आहे.

टाऊट्स (दलाल) लोक देशी पर्यटकांना सर्वकाही पुरवण्याचे आमिष दाखवून व नंतर त्यांना डान्सबार तसेच मसाज पार्लरमध्ये नेऊन त्यांना मारझोड करून लुबाडत असल्याचेही प्रकार घडत आहेत.

या विरोधात तेथील स्थानिकांनी वेळोवेळी आवाज उठवला होता. आता सरकारकडून करण्यात आलेल्या या कारवाईमुळे किनारीभागात कायदा आणि सुव्यवस्था राखण्यात येत असल्याची माहिती समोर येतेय.