पणजी: गोवा सरकारवर भ्रष्टाचाराचे आरोप करणारा Youtuber अडचणीत सापडला आहे. गोवा पोलिसांची गुन्हे शाखा सरकारची बदनामी केल्याबाबत या प्रकरणाचा तपास घेत आहे. गोवा पोलिसांनी या प्रकरणाचा तपास करण्यासाठी हरियाणासह दिल्लीत धडक दिली. Youtuber ने त्याच्या व्हिडिओत झुवारी जमीनीच्या 50 हजार कोटींचा घोटळ्याचा उल्लेख केला आहे.

गोवा सरकारवर भ्रष्टाचाराचा आरोप करुन बदनामीकारक व्हिडिओ तयार करत प्रसिद्ध केल्याप्रकरणी पोलिसांची गुन्हे शाखा तपास करत आहे. व्हिडिओसाठी जबाबदार असणाऱ्या लोकांच्या चौकशीसाठी पोलिसांनी हरियाणानंतर दिल्लीला भेट दिली.

रोहित उपाध्याय या Youtuber ने गोवा सरकारच्या विरोधात अनेक व्हिडिओ प्रसिद्ध केले आहेत. अलिकडेच त्याने विधानसभेत गाजलेला झुआरी जमीन घोटाळ्याचा मुद्दा उपस्थित केला. यात त्याने सरकारच्या ५० हजार कोटींच्या घोटाळ्याचा उल्लेख केला आहे. या व्हिडिओत त्याने आमदार विजय सरदेसाई यांची प्रतिक्रिया देखील जोडल्या आहेत.

येथे पाहा व्हिडिओ

सूत्रांनी दिलेल्या माहितीनुसार, गोवा सरकारने केलेल्या पैशांच्या उधळपट्टीवर भाष्य करणारे अनेक व्हिडिओ समाज माध्यमांवर प्रसिद्ध करण्यात आले आहेत. राज्य सरकारची चुकीची धोरणं आणि कंत्राटांना दिलेली मुदतवाढ यामुळे भ्रष्टाचाराला खतपाणी देण्याचे काम सरकारने केल्याचा आरोप करण्यात आला आहे. सरकार या बदनामी विरोधात सक्त झाल्याचे दिसून येते.

विजय सरदेसाईंनी केली टीका

गोव्यातील भ्रष्ट सरकारकडे संपूर्ण देशाचे लक्ष वेधून घेणाऱ्या काही इन्फ्लुएन्सर लोकांना पकडण्यासाठी गोवा सरकारने गोवा पोलीस हरियाणाला पाठवलेत. ५०,००० कोटींचे झुआरी जमिनीसारखे अवाढव्य घोटाळे होत आहेत. खरच तुम्हाला गोव्याबद्दल प्रेम असेल तर तुम्ही राज्याचे 30,000 कोटींचे संपूर्ण कर्ज चुकते करुन टीकाकारांना गप्प करू शकता.

पण तुम्ही ते करणार नाही कारण तुम्ही ते आश्रयदाते आहात ज्यांनी आमचे सुंदर राज्याचे तुकडे करून गोमंतकीयांच्या खर्चाने बाहेरच्या लोकांना विक्रीसाठी ठेवले आहे. गोव्याला उद्ध्वस्त केले जात आहे, अशा शब्दात विजय सरदेसाईंनी सरकारवर टीका केली.

कोण आहे रोहित उपाध्याय?

रोहित उपाध्याय एक प्रसिद्ध Youtuber आहे. प्रामुख्याने हिंदीतून व्हिडिओ करणारे रोहितच्या चॅनलला साडे सात लाख सबस्कार्यबर्स आहेत. रोहितने गोव्यातील अनेक विषयांवर भाष्य करणारे व्हिडिओ प्रसिद्ध केले आहेत.

गोवा स्कॅम फाईल्सच्या नावाने त्याने राज्यातील अनेक चर्चित मुद्यावर सविस्तर व्हिडिओ केल्यात. यात त्याने राज्यातील विविध भ्रष्टाचारावर भाष्य केले आहे. याशिवाय रोहितने इतर अनेक विषयावर सविस्तर विश्लेषण करणारे व्हिडिओ प्रसिद्ध केले आहेत.