Goa Police: कळंगुट-बागा परिसरातील 11 दलालांवर कळंगुट पोलिसांनी कारवाई केली. पर्यटकांना आमिष दाखवून त्यांची फसवणूक करण्याचे प्रकार कळंगुट-बागा येथील किनाऱ्यांवर होत असतात.

त्यामुळे गोवा पोलिसांकडून दलालांवर कारवाईच्या मोहिमा केल्या जात असतात. तशाच पद्धतीने रविवारी कळंगुट पोलिसांनी ही कारवाई केली. पर्यटकांना सुरक्षित वातावरण मिळावे, या उद्देशाने ही कारवाई करण्यात आली.

कळंगुट पोलिसांनी रविवारी या मोहिमेत 11 दलालांना ताब्यात घेतले. यातील अनेकांवर एकाहून अनेकदा कारवाईला सामोरे जावे लागले आहे. त्यामुळे त्यांना 50,000 रूपये दंड करण्यात आला.

कळंगुट परिसरात पर्यटकांना कोणताही त्रास होऊ नये यासाठी अशा मोहिमा नेहमी केल्या जातील, असे पोलिसांनी सांगितले. कळंगुट पोलिसांनी गतवर्षात 400 दलालांवर कारवाई केली होती. तर यावर्षी आत्तापर्यंत 650 दलालांवर कारवाई करण्यात आली आहे.

कळंगुट पोलिस स्टेशनतर्फे पर्यटकांसाठी आणि स्थानिकांसाठी देखील मदतीसाठी तत्पर आहे, असे पोलिस स्टेशनच्यावतीने सांगण्यात आले आहे.

दरम्यान, पर्यटन संचालकांकडूनही या दलालांवर 5000 रूपये दंडाची कारवाई करण्यात आली. तर दुसऱ्यांदा हा गुन्हा करणाऱ्यांना 20,000 रूपये दंड ठोठावण्यात आला आहे.