पणजी: राज्‍य प्रदूषण नियंत्रण मंडळ (पीसीबी), नगरपालिका आणि पंचायतींनी चार वर्षांत ५,०५८ ठिकाणी छापे टाकत प्‍लास्‍टिकमुक्तीसंदर्भातील निर्देशांचे पालन न करणाऱ्यांकडून सुमारे ७.८६ लाखांचा दंड वसूल केलेला आहे. दरम्‍यान, प्‍लास्‍टिकमुक्तीसंदर्भातील केंद्र सरकारने जारी केलेल्‍या निर्देशांची राज्‍यात काटेकोरपणे अंमलबजावणी करण्‍याचे निर्देश केंद्रीय प्रदूषण नियंत्रण मंडळाने गोव्‍यासह सर्वच राज्‍यांच्‍या ‘पीसीबीं’ना जारी केले आहेत.

डिसेंबर २०२५ ते २८ फेब्रुवारी २०२६ या कालावधीत ‘पीसीबी’ने विशेष पथके तयार करावी आणि महिन्यातून किमान चार दिवस नगरविकास खात्‍याच्‍या पथकांसमवेत संयुक्तपणे तपासणी करावी, तपासणी दरम्‍यान पोलिस पथक सोबत घ्‍यावे, राज्यस्तरीय मोहिमेच्या अंमलबजावणीसाठी राज्यस्तरीय नियंत्रण कक्ष स्थापन करावा, रस्त्यावरील विक्रेते, दुकाने, घाऊक बाजार, आंतरराज्यीय सीमा, औद्योगिक आस्‍थापने, बस डेपो, रेल्वे स्थानके, विमानतळे आणि इतर गर्दीच्या ठिकाणी लक्ष केंद्रित करून तपासणी करणे,

या मोहिमेतील अधिकाऱ्यांची अनुपालन देखरेख पोर्टलवर नोंदणी करणे, तपासणी अहवाल पोर्टलवर दाखल करणे, तपासणी अहवालात प्‍लास्‍टिक वस्तूंचे पुरवठादार, कच्च्या मालाचे पुरवठादार आणि उत्पादकांची माहिती पोर्टलवर समाविष्ट करणे, कारवाईची माहिती पाहणीसंदर्भात केलेल्‍या तक्रार ॲपवर टाकणे, संबंधित ॲपच्‍या वापराबाबत जागृती करणे, तक्रार अॅपवर प्राप्त झालेल्या सर्व तक्रारींचे मुदतीत निराकरण आदींसारखे निर्देश केंद्रीय प्रदूषण नियंत्रण मंडळाने जारी केले असून, फेब्रुवारी २०२६ पर्यंत दर महिन्याच्या अखेरीस केलेल्या कारवाईचा अहवाल सादर करण्‍याच्‍या सूचनाही जारी केल्‍या आहेत.

प्‍लास्‍टिकमुक्तीसंदर्भातील छापे

कार्यालय वर्ष छापे कचरा (किलोत) दंड

पीसीबी २०२२ १७२ ११४ १.०७ लाख

२०२३ ५१ २७७.२ २.७८ लाख

२०२४ २४ ८६ १.१५ लाख

पालिका २०२२ २९२ १२६.५ ९१ हजार

२०२३ २१६ ८७.४ १.०७ लाख

२०२४ ११ ६.०५ ७,४०० रुपये

पंचायती २०२२ ६५६ २८.८३२ १६,६०० रुपये

२०२३ २,४३४ १८८.७९ ५५,९०० रुपये

२०२४ १,२०२ २१.०८७ ७,९०० रुपये