म्हापसा: पेट्रोलमध्ये पाणी मिसळल्याने अनेक वाहने बंद पडली. अखेर पेट्रोल पंप मालकावर स्वखर्चाने ती वाहने दुरुस्त करण्याची वेळ आली. साळगाव येथे आज हा अजब प्रकार घडला. येथील एका पेट्रोल पंपावर पेट्रोल भरून घेतलेली वाहने काही अंतरावर जाऊन बंद पडू लागली. वाहन मालकांनी शोध घेतल्यावर टाकीत पाण्यावर पेट्रोल तरंगत असल्याचे त्यांना दिसले.

त्यांनी तत्काळ पेट्रोल पंपावर जाब विचारण्यासाठी धाव घेतली. परिस्थितीचे गांभीर्य ओळखून पेट्रोल पंपावरील कर्मचाऱ्यांनी मालकाला पाचारण केले. त्याने ही वाहने दुरुस्त करून देण्याचा मार्ग स्वीकारला. मॅकेनिक आणला गेला आणि वाहने दुरुस्त करून मार्गी लावण्यात आली. ४० वाहनांना याचा फटका बसला होता.

मिळालेल्या माहितीनुसार, सकाळी इंधनाचा नवा साठा भरताना रीतसर तपासणी केली होती. तेव्हा पेट्रोल-डिझेलमध्ये पाण्याचा अंश नव्हता. मात्र, नंतर ग्राहकांच्या तक्रारी आल्या. कदाचित जमिनीखालच्या मुख्य टाकीत खालून पाणी झिरपल्याने हा प्रकार घडला असावा. मालकाच्या त्वरित आणि सकारात्मक प्रतिसादामुळे निर्माण झालेला तणाव निवळला.