Pernem Bus Stand पेडणे येथील बस स्थानकावर थांबा न घेता परस्पर महामार्गाने प्रवास करणाऱ्या महाराष्ट्रातील एसटी तसेच कदंब बसगाड्यांनी या बस स्थानकावर थांबा घ्यावा, या मागणीसाठी येथील नागरिकांनी गुरुवारी सरकारी संकुलाजवळ उपोषण केले. उपजिल्हाधिकारी दीपक वायंगणकर यांनी भेट घेऊन आश्वासन दिल्यानंतर हे आंदोलन मागे घेण्यात आले.

सिंधुदुर्ग व महाराष्ट्रातील विविध भागात प्रवासी वाहतूक करणाऱ्या महाराष्ट्रातील एसटी व कदंब महामंडळाच्या बऱ्याच बसगाड्या पेडणे बस स्थानकात न येता प्रवाशांना महामार्गावर उतरवून परस्पर निघून जातात.

त्यामुळे बस स्थानकावर थांबणाऱ्या प्रवाशांची गैरसोय होते. त्यामुळे या बसगाड्यांना बसस्थानकावर येणे सक्तीचे करावे, अशी या आंदोलकांची मागणी होती. जगन्नाथ पंडित, चंद्रकांत जाधव, आनंद नाईक, भास्कर नारुलकर, उदय मांद्रेकर, उमेश तळवणेकर आदींनी यावेळी या समस्येकडे लक्ष वेधले.

दरम्यान, उपजिल्हाधिकारी दीपक वायंगणकर यांनी आंदोलकांची भेट घेऊन यावर तोडगा काढण्याचे आश्‍वासन दिले. याबाबत लवकरच सर्व संबंधित खात्याच्या अधिकाऱ्यांशी चर्चा करून ही समस्या सोडविण्यात येईल, असे त्यांनी सांगितले. त्यानंतर हे आंदोलन मागे घेण्यात आले.