Mandovi Bridge: गोव्यात वाहतूक कोंडीची समस्या काही नवीन नाही पण एका झोपलेल्या व्यक्तीमुळे वाहतूक कोंडी झाली असं जर तुम्हाला सांगितलं तर कदाचित तुमचा त्यावर विश्वास बसणार नाही.

पण हो प्रकार घडलाय आणि तोही राजधानी पणजीत. त्याच झालं असं की, आज 24 जानेवारीला दुपारचा सुमारास मांडावी पुलावर दुचाकी पार्क करून मद्यधुंद अवस्थेतील एक महाशय ब्रिजच्या कठड्यानजीक भर उन्हात झोपलेले आढळून आले.

घटनेबद्दल काहीच खुलासा होईना म्हणून जागृत नागरिकांनी पोलीस दलाला आणि रुग्णवाहिकेला पाचारण केलं.

कार्यतत्पर पोलीस आणि रुग्णवाहिका काही अवधीतच घटनास्थळी दाखल झाले. पण तोवर या सर्व प्रकारामुळे मांडावी पुलावर बराच वेळ वाहतूक कोंडी निर्माण झाली होती.

पोलीस कर्मचाऱ्यांनी आणि रुग्णवाहिकेतील कर्मचाऱ्यांनी त्या झोपलेल्या महाशयांना उठवण्याचा प्रयत्न केला खरा पण उठवण्यासाठी आलेल्या कर्मचाऱ्यांना शिव्यांची लाखोली वाहत ते महाशय उठण्यास नकार देऊ लागले.

शेवटी पोलिसांनी रुग्णवाहिकेतील कर्मचाऱ्यांच्या मदतीने संबंधित महाशयांना घटनास्थळावरून उठवत वाहतूक सुरळीत करून रस्ता वाहनांसाठी मोकळा केला. या घटनेबद्दल काही काळ चर्चा रंगली होती.