म्हापसा ता. ७ (प्रतिनिधी): हडफडे येथील 'बर्च बाय रोमिओ लेन क्लब' या क्लबमध्ये शनिवारी (दि.६) मध्यरात्री लागलेल्या भीषण आगीत २५ जणांचा मृत्यू झाल्याची धक्कादायक घटना घडली. अग्रिशमन दल आणि पोलिसांनी सर्व मृतदेह बाहेर काढून त्यांना जीएमसीमध्ये पाठविले आहे. आगीचे नेमके कारण अद्याप स्पष्ट नसले, तरी सिलिंडर स्फोट झाल्याची शक्यता व्यक्त केली जात आहे.

मृत्यूचा नेमका आकडा काय?

गोवा पोलिसांनी दिलेल्या माहितीनुसार 'क्लब बर्च बाय रोमियो लेन'मध्ये लागलेल्या या मोठ्या आगीत २५ हून अधिक लोकांचा दुर्दैवी मृत्यू झाला आहे. मृतांमध्ये ४ पर्यटक असल्याचे निश्चित झाले आहे, तर १४ जण क्लबचे कर्मचारी होते. उर्वरित ७ जणांची ओळख अद्याप पटलेली नाही.

मृतांमध्ये तीन महिलांचा समावेश असून, दोघांचा मृत्यू आगीत होरपळून तर उर्वरितांचा धुरामुळे गुदमरून झाल्याचे प्राथमिक तपासातून समोर आले आहे. मृतांमध्ये क्लबचा स्टाफ तसेच काही पर्यटकांचा समावेश असल्याची माहिती उपलब्ध झाली आहे.

उपलब्ध माहितीनुसार, आगीने काही क्षणांतच संपूर्ण क्लबला विळखा घातला. लाकडी संरचना, सजावट आणि ज्वलनशील साहित्य यामुळे ज्वाळांचा वेग वाढला. धुराचे दाट लोट आणि बाहेर पडण्यासाठीची धडपड यामुळे घटनास्थळी प्रचंड गोंधळ उडाला. म्हापसा, पणजी आणि कळंगुट अग्रिशमन दलाच्या गाड्यांनी तातडीने धाव घेत बचावकार्य सुरू केले. स्थानिक नागरिकांनीही स्वयंसेवक म्हणून मदत केली. अनेक मृतदेह ओळखण्याजोगे नसल्याने त्यांची ओळख पटविणे अवघड ठरणार आहे

घटनेची माहिती मिळताच मुख्यमंत्री, स्थानिक आमदार मायकल लोबो, पोलिस महासंचालक आलोक कुमार तसेच मोठ्या संख्येने पोलिस कर्मचारी घटनास्थळी दाखल झाले. दरम्यान, पोलिस तपास सर्व बाजूंनी सुरू असून, या दुर्घटनेमुळे गोव्यातील हॉटेल, क्लब आणि रेस्टॉरंटमधील अग्निसुरक्षा उपाययोजनांबाबत गंभीर प्रश्न पुन्हा एकदा ऐरणीवर आला आहे.

अत्यंत दुर्दैवी घटना : मायकल लोबो

आमदार मायकल लोबो म्हणाले, "ही घटना अत्यंत भीषण आहे. सुरक्षा नियमांचे उल्लंघन झाले असल्यास कठोर कारवाई केली जाईल. यासंदर्भात मी जिल्हाधिकान्यांना पत्र लिहिणार असून, स्थानिक पंचायतींनी सर्व क्लबमध्ये आपत्कालीन सुरक्षेची तपासणी करावी"