Goa News: वाहनाचे नुकसान करून जीवे मारण्याची धमकी दिल्याप्रकरणी वेर्णा पोलिसानी नोंदवलेल्या गुन्ह्यात कोणताच पुरावा नसल्याने प्रकरण बंद करण्यासाठी सादर केलेला ‘ए समरी’ अहवाल मडगाव प्रथमश्रेणी न्यायालयाने फेटाळून आरोपपत्रावरील खटला सुरू करण्याचा आदेश दिला होता.

त्याला जुआंव परेरा व जेर्वासिओ परेरा या दोघांनी आव्हान दिलेली फौजदारी याचिका मुंबई उच्च न्यायालयाच्या गोवा खंडपीठाने फेटाळून प्रथमश्रेणी न्यायालयाच्या आदेशावर शिक्कामोर्तब केले.सालसेत येथील जुआंव परेरा व जेर्वासिओ परेरा या दोघांनी आलेक्सिओ आर्नोल्फो याच्या अलिशान गाडीच्या दर्शनी भागावर बांबूने हल्ला करून नुकसान केले होते.

त्यानंतर त्याला जीवे मारण्याची धमकी दिली होती. याप्रकरणी 4 जून 2016 रोजी वेर्णा पोलिसांनी याचिकादारांविरुद्ध गुन्हा दाखल केला होता. तपासावेळी ही घटना पाहिलेला कोणीही साक्षीदार पुढे येत नसल्याने पोलिसांनी पुराव्याअभावी या प्रकरणाचा ‘ए समरी’ अहवाल प्रथमश्रेणी न्यायालयात अहवाल सादर केला होता.

13 जुलै 2018 रोजी न्यायालयाने तो मान्य केला नव्हता. पुरावा नसला तरी प्रथमदर्शनी दिलेल्या तक्रारीनुसार व पोलिसांनी दाखल केलेल्या पंचनाम्यानुसार गुन्हा घडल्याचे दिसून येते, असे निरीक्षण नोंदवून तो अहवाल फेटाळला होता.