Illegal Tenant Verification : गेल्या दिवसात राज्यात एकूण 6 खून झाल्यामुळे सर्वत्र भीतीचे वातावरण पसरले आहे. यामुळे भाडेकरू पडताळणीचा वादग्रस्त मुद्दा पुन्हा ऐरणीवर आला आहे.

या घटनांमुळे गोवा पोलिसांसमोर अनेक प्रश्न निर्माण झाले आहेत. पोलिसांनी खरंच योग्यरित्या भाडेकरू पडताळणीचे काम केले आहे का? भाडेकरू पडताळणीच्या नियमांचे उल्लंघन केल्याप्रकरणी पोलिसांनी घरमालकांवर आणि भाडेकरूंवर कारवाई केली आहे? असे सवाल सध्या उपस्थित केले जात आहेत.

भाडेकरू पडताळणीची मोहीम बदलत्या काळाशी ताळमेळ राखण्यात अयशस्वी ठरली आहे. त्यामुळे राज्यात अधिक स्थलांतरितांचा ओघ वाढल्याने हे आणि इतर अनेक प्रश्‍न पोलिसांच्या समोर येऊ शकतात.

उपविभागीय पोलीस अधिकारी संतोष देसाई यांना भाडेकरू पडताळणीच्या कामाबद्दल प्रश्न विचारला असता, त्यांनी भाडेकरूंची पडताळणी सुरू असल्याचे सांगितले.

त्यांनी दिलेल्या माहितीनुसार, केवळ गोवा पोलीसच नाही तर दहशतवादविरोधी पथकही (ATS) राज्यभरातील भाडेकरू पडताळणीच्या मोहिमेत गुंतलेले आहे.

राज्यातील वाढत्या गुन्ह्यांमुळे या मोहिमेबाबत पोलीस अधिकच सतर्क झाले आहेत; कारण या घटनांमध्ये परप्रांतीयांचा प्रामुख्याने सहभाग असल्याचे समोर आले आहे.