वास्को: बायणा येथे ६४ वर्षीय वृद्ध महिलेचा गळा चिरून खून केल्याची धक्कादायक घटना रविवारी (२१ सप्टेंबर) उघडकीस आली. याप्रकरणी मूळ आसाम येथील २१ वर्षीय तरुणाला अटक करण्यात आली आहे. मुरगाव पोलिसांनी ही कारवाई केली.

बायणा येथील नायक इमारतीच्या तिसऱ्या मजल्यावर राहणाऱ्या ६४ वर्षीय वृद्ध महिलेचा रविवारी खून झाला होता. यानंतर संशयित फरार होता. मुरगाव पोलिस त्याच्या मागावर होते. अखेर संशयिताला अटक करण्यात पोलिसांना यश आले आहे. तरुणाने महिलेचा खून का केला? याची माहिती अद्याप समोर आलेली नाही.

मेहरुनिसा बिडिकर (६४) या महिलेचा रविवारी खून करण्यात आला. महिला तिसऱ्या मजल्यावर एका फ्लॅटमध्ये एकटीच राहत होती. दरम्यान, संशयिताने महिला एकटी असल्याचे पाहून तिच्यावर चाकूने हल्ला केला. तरुणाने महिलेचा गळा चिरल्याने तिचा मृत्यू झाला. खून करण्यासाठी वापरण्यात आलेले चाकू पोलिसांना घटनास्थळीच आढळून आला.

वृद्ध महिलेच्या मुलाने पोलिसांना दिलेल्या माहितीनुसार, वृद्ध महिलेने संशयिताला कोणत्यातरी गोष्टीवरुन जाब विचारला. याच राग आल्याने संशयिताने हल्ला केला. भीतीने महिलेने बाहेर धाव घेतली पण, संशयिताने चाकू हल्ला केला, प्रचंड रक्तस्त्राव झाल्याने महिलेचा मृत्यू झाला.

पोलिसांनी तपासासाठी फॉरेन्सिक पथकाला पाचारण केले. संशयित दारुच्या नशेत असल्याचे देखील सांगितले जाते. दरम्यान, पोलिस तपासाअंतीच त्याने वृद्ध महिलेचा खून का केला समोर येण्याची शक्यता आहे.