Panjim: 50 मायक्रॉनहून कमी जाडीच्या प्लास्टिक पिशव्यांचा अजूनही शहरात सर्रासपणे व्यावसायिक करीत आहेत. महापालिकेने प्लास्टिकविरोधी मोहीम राबवली असली तरी या मोहिमेला जी धार हवी होती, ती नसल्याचे दिसून येते.

एकवेळ वापराच्या प्लास्टिकला बंदी असली तरी कमी जाडीच्या प्लास्टिक पिशव्यांचा मासळी, कपडे, भाजी विक्रेत्यांकडे चोरून वापर सुरू आहे. ग्राहकांना पिशव्या देणे हे कर्तव्यच आहे, अशी त्यांची धारणा आहे.

महापालिका मार्केट, कदंब बस स्थानक परिसरातील फुलविक्रेते, फळविक्रेते कमी जाडीच्याच प्लास्टिक पिशव्या वापरतात. काही आठवड्यांपूर्वी नगरसेवक उदय मडकईकर यांनी कमी जाडीच्या प्लास्टिक पिशवीतून मासे दिले जात असल्याचे छायाचित्र समाज माध्यमांवर सामायिक केले होते.

त्यानंतर महापालिका बाजार समितीला जाग आली, पण कारवाई शून्यच राहिली. दरम्यान, प्लास्टिक विरोधी कारवाईविषयी महापालिका बाजार समितीचे चेअरमन बेन्टो लॉरेन यांना संपर्क साधला असता, ते परदेशवारीवर असल्याची माहिती मिळाली. गोव्यात येताच कारवाईविषयी सर्व माहिती देतो, असेही त्यांनी सांगितले.