Mopa Airport News: मोपा विमानतळावर टॅक्सी व्यवसायात येऊ इच्छिणाऱ्या युवकांना रोजगार मिळावा, या संदर्भात पेडणे वाहतूक कार्यालयाला निवेदनाद्वारे टॅक्सी स्टँडचा प्रस्ताव तयार करण्याची विनंती केली होती. पण अद्याप काहीच हालचाल दिसत नाही, त्यामुळे आज पुन्हा सुदीप ताम्हणकर यांनी युवकांना संधी द्यावी, या मागणी संदर्भात स्मरणपत्र दिले.

प्रस्तावित टॅक्सी स्टँडसाठी भूसंपादन केले, नाही, हे तपासण्याची विनंतीही केली होती. पण चौदा दिवस उलटूनही पेडणे वाहतूक खात्याने अद्याप आम्हांला कसलीही माहिती दिलेली नाही. वाहतूक खात्याने यासंबंधीची माहिती त्वरित द्यावी, यासंबंधीची माहिती न दिल्यास पुढची पावले उचलली जातील, असा इशाराही त्यांनी यावेळी दिला. त्यांच्यासोबत नितीन नर्से होते.

मोपा विमानतळ टॅक्सी स्टँडचा प्रश्न सोडविण्यासाठी आरटीएची बैठक आजपर्यंत घेण्यात आलेली नाही. तसेच आरटीएकडून कोणताही निर्णय घेण्यात आलेला नसल्याचे स्पष्ट झालेले आहे.

मोपा आंतरराष्ट्रीय विमानतळावरील टॅक्सी सेवा सुरू करण्याबाबत अनेक शासकीय अधिकाऱ्यांचे प्रतिनिधी बिनबुडाचे वक्तव्य करून या तरुणांची दिशाभूल करत आहेत, असेही सुदीप ताम्हणकर व राजू नर्से यांनी सांगितले.