पणजी: यंदाच्या हंगामातील सर्वाधिक नोंद करीत पावसाने सोमवारी सरासरी गाठली. गेला आठवडाभर पाऊस सरासरीच्या तुलनेत 11 टक्क्यांनी घसरला होता. यापूर्वी 15 जून रोजी 120.8 मि.मी. पावसाची नोंद झाली होती. काल दिवसभरात 130.3 मि.मी. पावसाची नोंद झाली. (Goa Monsoon Update highest rainfall recorded in Goa)

राज्यात सर्वच तालुक्यांना आज पावसाने झोडपून काढले. हवामान वेधशाळेच्या अंदाजानुसार रविवारपासून राज्यात पावसाचा जोर वाढला आहे. मध्यरात्री राज्यात तुफान पर्जन्यवृष्टी झाली. शिवाय सकाळी दहा वाजेपर्यंत पावसाचा जोर कायम होता. त्यानंतर काही काळ पावसाने उसंत दिली, पण रीपरीप कायम होती. सोमवारी राज्यात सर्वाधिक 130.3 मि.मी. पावसाची नोंद झाली. गतवर्षीच्या हंगामात २२ सप्टेंबर रोजी 137.3 मि.मी. इतक्या सर्वाधिक पावसाची नोंद झाली होती, तर यंदाच्या हंगामात 15 जून रोजी 120.8 मि.मि. इतक्या पावसाची नोंद झाली होती.

16 जुलैपर्यंत पाऊस सरासरीपेक्षा 15 टक्क्यांनी अधिक होता. गेला आठवडाभर पावसाचा जोर ओसरल्यामुळे सरासरी 11 टक्क्यांनी घटली होती. आता पुन्हा जोर वाढल्याने पावसाने सोमवारी सरासरी गाठली. राज्याची 12 जुलैपर्यंतची सरासरी 1303.9 इतकी आहे, तर आतापर्यंत 1289.9 मि.मी. इतकी नोंद झाली आहे. 15 जुलैपर्यंत राज्यात अतिवृष्टीचा इशारा वेधशाळेने दिला आहे.

राज्य गारठले

गेले काही दिवस राज्यात पारा वाढला होता. रविवारी (ता. ११) मध्यरात्रीपासून वातावरणात अचानक बदल झाला आहे. तापमान ३२ अंश सेल्सियसवरून 28 वर आले असल्याने गारठा निर्माण झाला आहे. याकाळात सर्दी आणि पडशाची शक्यता असल्याने दक्षता घेण्याचे आवाहन करण्यात आले आहे. पावसाचा जोर वाढल्याने शेतकामांनाही वेग आला आहे. गोव्यातील एक सुंदर पर्यटनस्थळ म्हणून नावाजले जाणारे साळावली धरण सोमवारी काठोकाठ भरले असून 42 मीटर उंचीवरून फेसाळत कोसळणारे पाणी पाहण्याचा सर्वोच्च आनंदाचा क्षण आता केव्हाही निर्माण होऊ शकतो.