Goa Rain: सांगेत परतीच्या पावसाने व्हालसेभाटी येथे प्रचंड प्रमाणात कहर केला. मुख्य रस्त्यावरील पूल पुराच्या पाण्यात बुडाल्याने शुक्रवारी संध्याकाळी दोन तास वाहतूक खोळंबली, तर बागायती, ऊसशेतीमध्ये पाणी शिरले. एकूणच निसर्गाचा रौद्रवतार प्रथमच पाहिल्याचे ग्रामस्थांनी सांगितले.

गुरुवारी संध्याकाळी गडगडाटासह चार तास पाऊस पडल्यामुळे व्हालसे नदीतील पाणी अचानक वाढू लागले. पावसाच्या हंगामातही इतके पाणी कधी पाहिले नसल्याचे ग्रामस्थ सांगतात.

नदीच्या काठावर बागायत असलेल्या बाबू वेळीप यांना या निसर्ग प्रकोपाचा फटका सहन करावा लागला. येथील आंब्याचा मोठा वृक्ष उन्मळून प्रवाहासोबत वाहत पुलाच्या कमानीत अडकून पडला. तसेच पाण्याच्या प्रवाहासह रस्त्याकडेचा मातीचा भराव वाहून गेला.

पावसाळ्यातही इतका पूर नव्हता

भाटीचे चंद्रकांत गावकर, पोरो गावकर म्हणाले की, पावसाळ्यात सतत पाऊस पडूनही नदीला इतका पूर कधीच आला नव्हता. एक प्रकारे ढगफुटीच झाल्याचा अनुभव आला. कर्नाटकाच्या शिगोणे नदीतून पाण्याचे लोट वाहून येत होते. यापूर्वी काणकोण, नेत्रावळीत ढगफुटीमुळे आलेल्या पुराची आठवण आली.

सरकारी यंत्रणा आली, तशी परतली

पुलाखाली अडकलेला आम्रवृक्ष काढण्यासाठी साबांने जेसीबी यंत्र पाठविले होते. पण वृक्षाचा आकार पाहता चार यंत्रे लावली तरी ते नदीपात्रातून हटविणे शक्य नसल्याने जेसीबी परतले. अग्निशमन दलानेही प्रयत्न करून पाहिला. पण त्यांनाही शक्य झाले नाही. त्यामुळे अग्निशमन दलालाही परतावे लागले.