Goa Municipality: नव्या इमारतीसाठी महापालिकेचा जुन्या बांधकामांवर हातोडा

Goa Municipality: महापालिकेने आपल्या इमारतीलगत असलेल्या मार्केटच्या इमारतीवरील पत्रे आणि इतर साहित्य हटविण्यास शुक्रवारपासून सुरुवात केली आहे. प्रत्यक्षात पक्के बांधकाम हटविण्याचे काम जेसीबीच्या साह्याने पुढील आठवड्यात सुरु होईल, असे महापालिकेच्या अधिकाऱ्यांनी सांगितले.

पहिल्या टप्प्यात 11 कोटींचे इमारतीचे काम करण्याचे महापालिकेने मनावर घेतले आहे. त्यानुसार गोवा राज्य नगर नियोजन खात्याच्या वतीने हे काम मार्गी लागले असल्याने जुन्या बीएसएनएलच्या कार्यालयाच्या जागी ही इमारत उभारली जाणार आहे.

पार्किंगसह महापालिकेचे कार्यालय या ठिकाणी असेल. त्यानंतर महापालिकेची सध्याची इमारत आणि बाजूच्या भागात टप्प्याटप्प्याने इमारतीची उभारणी केली जाणार आहे. या इमारतीचे बांधकाम खरेतर आजच जेसीबीच्या साह्याने हटविले जाणार होते.

परंतु संबंधित कंत्राटदाराचा जेसीबी उपलब्ध होऊ शकला नसल्याने पक्के बांधकाम हटविण्यास सुरुवात झाली नाही. यू आकाराच्या या इमारतीचा एक भाग हटविला जाणार असून, त्या ठिकाणी नवी इमारत उभारली जाईल.

वैशिष्ट्यपूर्ण नोंद

या नव्या इमारतीचा विषय खऱ्या अर्थाने सध्याचे नगरसेवक सुरेंद्र फुर्तादो हे महापौर असताना मंजूर झाला होता. तेव्हा मनोहर पर्रीकर यांनी या इमारतीला लागणाऱ्या निधीविषयी फुर्तादो यांना आश्‍वासन दिले होते. पण ते काम या ना त्या कारणाने रेंगाळत राहिले. आता बाबूश मोन्सेरात आमदार आणि त्यांचे पुत्र रोहित मोन्सेरात यांच्या काळात ही इमारत उभारली जात असल्याने ही नोंदही वैशिष्ट्यपूर्ण असेल.