पणजी: मान्‍सून हंगाम संपण्‍यास अवघे तीन दिवस शिल्लक राहिले आहेत. मात्र पावसाची तूट कायम आहे. यंदाच्‍या हंगामात १ जून ते २७ सप्‍टेंबर या कालावधीत सरासरीपेक्षा ३१.१ टक्‍के म्‍हणजेच ३६.४१ इंच इतका कमी पाऊस पडला आहे.

गतसाली चौदापैकी सात केंद्रांमध्‍ये शंभर इंचांपेक्षा अधिक पावसाची नोंद झाली होती. यंदा केवळ तीनच केंद्रांवर पावसाने इंचांचे शतक गाठल्‍याचे हवामान खात्‍याने जारी केलेल्‍या आकडेवारीतून दिसून येते.

यंदा मान्‍सूनचा पाऊस राज्‍यात ५ जून रोजी दाखल झाला. त्‍यामुळे गतवर्षीपेक्षा यंदा अधिक पाऊस पडण्‍याचा अंदाज वर्तवण्‍यात येत होता. परंतु, सुरुवातीचे काही दिवस बरसल्‍यानंतर पावसाने चार महिन्‍यांतील ११९ दिवसांपैकी बहुतांशी दिवस दडीच मारली. त्‍यामुळे सरासरी पावसातील तूट वाढत जाऊन ती जुलैमध्‍ये ३० टक्‍क्‍यांवर पोहोचली. तेव्‍हापासून आतापर्यंत ही तूट कायम राहिल्‍याचे दिसून येते.

१ जून ते २७ सप्‍टेंबर या मान्‍सून हंगामात राज्‍यात सरासरी ११७.३३ इंच पाऊस पडतो. यंदा मात्र या कालावधीत ८०.९२ इंच इतक्‍याच पावसाची नोंद झाली आहे. यातून हा पाऊस सरासरीच्‍या ३१.१ टक्‍के म्‍हणजेच ३६.४१ टक्‍क्‍यांनी कमी असल्‍याचे स्‍पष्‍ट होते.

गतवर्षी मान्‍सून हंगामातील १ जून ते २७ सप्‍टेंबर या काळात एकूण ११९.३२ इंच पाऊस पडला होता. हा पाऊस सरासरीच्‍या दोन टक्‍के अधिक होता. शिवाय या काळात सांगे, धारबांदोडा, वाळपई, केपे, फोंडा, साखळी आणि पेडणे या सात केंद्रांवर पावसाने इंचांचे शतकही पूर्ण केले होते. यंदा मात्र केवळ वाळपई, धारबांदोडा आणि सांगे या तीनच केंद्रांवर पावसाने इंचांची शंभरी पार केली आहे.

धरणांमध्‍ये समाधानकारक जलसाठा

यंदा राज्‍यात सरासरीपेक्षा कमी पाऊस झाला असला, तरी धरणांतील जलसाठा मात्र समाधानकारक असल्‍याचे जलस्रोत खात्‍याने जारी केलेल्‍या आकडेवारीतून दिसून येते. सद्य:स्‍थितीत साळावलीत १०१ टक्‍के, तिळारीत ९१ टक्‍के, अंजुणेत ९७ टक्‍के, चापोलीत ७४ टक्‍के, आमठाणेत १०० टक्‍के तर पंचवाडी आणि गावणे या दोन धरणांत प्रत्‍येकी ९८ टक्‍के इतका जलसाठा आहे.

आत्तापर्यंतचा पाऊस

(इंचांत)

केंद्र पाऊस

म्‍हापसा ६२.२९

पेडणे ७६.३६

पणजी ५४.५२

जुने गोवे ७१.०३

साखळी ८१.८१

वाळपई १११.६८

फोंडा ७६.९५

धारबांदोडा ११०.५०

काणकोण ८७.३५

दाबोळी ६२.०१

मडगाव ८०.४१

मुरगाव ६०.१२

केपे ९६.२८

सांगे १०३.७३