Goa Monsoon 2023: चतुर्थीपासून राज्यात मोठ्या प्रमाणात पाऊस कोसळत असून मागील दोन दिवस काही प्रमाणात पावसाने विश्रांती घेतली होती. परंतु आज, शुक्रवारी सकाळपासूनच पावसाने राज्याला झोडपले.

दक्षिण कोकण आणि गोव्याच्या किनारपट्टी भागात कमी दाबाचा पट्टा निर्माण झाला आहे. त्यामुळे रविवारपर्यंत अतिवृष्टीचा इशारा हवामान खात्याने दिला आहे.

अरबी समुद्रात तसेच बंगालच्या उपसागरात कमी दाबाचा पट्टा तयार झाला असल्याने कोकण-गोवा किनारपट्टीवर मुसळधार पाऊस पडत आहे. उद्या शनिवार आणि रविवारीही राज्यात मुसळधार पावसाची शक्यता हवामान खात्याने वर्तवली असून नागरिकांनी सतर्क राहण्याचे आवाहन करण्यात आले आहे.

राज्यात आज शुक्रवारी व उद्या शनिवारी ऑरेंज अलर्ट जारी करण्यात आला आहे. राज्यात मागील 24 तासांत 2.37 इंच पावसाची नोंद झाली असून आत्तापर्यंत एकूण 128.9 इंच पावसाची नोंद झाली आहे.

पणजीतील रस्ते बुडाले

पणजीतील रस्ते पाण्याखाली गेले असून शहरातील सखल भागात पाणी साचले आहे. दुचाकी तसेच चारचाकी वाहनचालकांना दृश्‍यमानता कमी झाल्याने वाहने सावकाश चालवावी लागत होती.

गोव्यासह महाराष्ट्र, कर्नाटक तसेच केरळ किनारपट्‍टीत पाऊस सक्रिय असून चक्रीवादळाची शक्यताही वर्तविण्यात आली आहे.

मच्छिमारांना इशारा

राज्यासह महाराष्ट्र, गोवा किनारपट्टीतील बंदरांना पावसाचा जोर वाढणार असल्याने तसेच 45 ते 55 कि.मी. प्रतितास वारे वाहण्याची शक्यता असल्याने सतर्कतेचा इशारा देण्यात आला असून मच्छीमारांनी समुद्रात प्रवेश न करण्याचे आवाहन करण्यात आले आहे.