Goa MLA And Minister Leh Ladakh Study Tour: गोव्यातील मंत्री आणि आमदार केंद्र शासित प्रदेश लेह-लडाख येथे अभ्यास दौऱ्यासाठी जाणार आहेत. गोवा विधानसभेचे सभापती रमेश तवडकर यांनी याबाबत प्रस्ताव सादर केल्याची माहिती आहे. पाच दिवसांच्या या अभ्यास दौऱ्यासाठी इच्छुक आमदारांनी नोंदणे करण्याचे आवाहन तवडकरांनी केले आहे.

मिळालेल्या माहितीनुसार, राज्यातील आमदार आणि मंत्र्यांचा येत्या 6 ते 10 सप्टेंबर या कालावधीत लेह लडाख येथे अभ्यास दौरा नियोजित करण्यात आलाय. पाच दिवसांच्या या अभ्यास दौऱ्यासाठी इच्छुक आमदारांनी 31 ऑगस्टपर्यंत इच्छा प्रकट करायची आहे. अशी माहिती समोर आली आहे.

पाच दिवसांच्या या दौऱ्यात मंत्री आणि आमदार कोणत्या ठिकाणी भेट देणार आहेत तसेच, कोणत्या विषयाशी निगडीत हा अभ्यास दौरा असेल याबाबत माहिती मिळू शकली नाही. दरम्यान, फेब्रुवारीत नऊ आमदार गुजरात दौऱ्यावर गेले होते त्यानंतर आमदारांचा हा दुसरा दौरा असेल.

गुजरात दौऱ्याला विजय सरदेसाईंना केला होता विरोध

गोवा सरकारच्या वतीने गुजरात मध्ये सुप्रसाशन व्यवस्थेचा अभ्यास करण्यासाठी 19 ते 21 फेब्रुवारीला अभ्यास दौरा आयोजित केला होता. या दौऱ्यावर विजय सरदेसाई यांनी सडकून टीका केली होती.

जनतेच्या पैशावर काढलेल्या मौजमजेच्या ट्रिपमध्ये मला रस नाही असे म्हणत या अभ्यास दौऱ्याच्या शिष्टमंडळातून माझे नाव वगळावे अशी मागणी सरदेसाई यांनी केली होती. मंत्री गुजरात मध्ये सुप्रसाशन व्यवस्थेचा अभ्यास करण्यासाठी दौऱ्यावर जात आहेत ही हास्यास्पद बाब आहे. असेही सरदेसाई म्हणाले होते.