पणजी: गोव्यातील सुशिक्षित आणि कुशल तरुणाईला रोजगाराच्या संधी उपलब्ध करून देण्यासाठी राज्य सरकारच्या श्रम आणि रोजगार आयुक्तालयाअंतर्गत असलेल्या विभागीय रोजगार विनिमय केंद्र पणजी यांच्या वतीने रविवार, १४ जून रोजी बांबोळी येथील डॉ. श्यामाप्रसाद मुखर्जी इनडोअर स्टेडियममध्ये ‘मेगा जॉब फेअर २०२६’चे आयोजन करण्यात आले आहे.

सकाळी १० ते सायं. ५ वा. या वेळेत होणारा हा मेळावा राज्यातील आतापर्यंतच्या सर्वात मोठ्या रोजगार मेळाव्यांपैकी एक असणार असून सुमारे ३,५०० हून अधिक तरुणांना नोकऱ्या देण्याचा मानस आहे. या नोकरी मेळाव्याच्या उद्‌घाटनसमयी मुख्यमंत्री डॉ. प्रमोद सावंत, कामगारमंत्री बाबूश मोन्सेरात व इतर मान्यवर उपस्थित राहणार आहेत. या रोजगार मेळाव्यात राज्यातील तरुणाईने मोठ्या प्रमाणात सहभागी व्हावे, असे आवाहन मोन्सेरात यांनी केले आहे.

या भव्य रोजगार मेळाव्याचे उद्देश राज्यातील तरुण जे नोकरीच्या शोधात आहेत आणि विविध क्षेत्रातील नामांकित कंपन्यांना एकाच छताखाली आणणे हा आहे. यामुळे उमेदवारांना थेट मुलाखतीची संधी मिळेल, तर दुसरीकडे खासगी क्षेत्रातील कंपन्यांना त्यांच्या गरजेनुसार योग्य मनुष्यबळ निवडणे सुलभ होणार आहे. गोव्याच्या औद्योगिक आणि आर्थिक विकासाला गती देण्यासाठी देखील हा उपक्रम अत्यंत पूरक ठरेल.

नामांकित कंपन्यांचा सहभाग

या मेळाव्यात फार्मा, विमान वाहतूक, हॉस्पिटॅलिटी (हॉटेल), ऑटोमोबाईल आणि लॉजिस्टिक क्षेत्रातील नामांकित कंपन्या सहभागी होत आहेत. विविध शैक्षणिक पात्रता असलेल्या सर्वच उमेदवारांसाठी येथे रोजगाराच्या अनेक संधी उपलब्ध आहेत. या मेळाव्यात सहभागी होण्यासाठी इच्छुक उमेदवार आणि नियोक्त्यांनी https://goajobfair.com या संकेतस्थळावर आगाऊ नोंदणी करणे आवश्यक आहे.