पणजी : गोवा वैद्यकीय महाविद्यालय आणि रुग्णालयाचा आपत्कालीन औषध विभाग सक्षम करण्यावर भर देण्यात येणार आहे, अशी माहिती आरोग्यमंत्री विश्‍वजित राणे यांनी दिली. (goa medical college vishwajit rane)

यासंबंधी गोवा वैद्यकीय महाविद्यालय आणि रुग्णालयाचे डीन डॉ. शिवानंद बांदेकर, आरोग्य सचिव यांची बैठक झाली. रुग्णालयाची आपत्कालीन यंत्रणा सक्षम करण्याबरोबरच आरोग्य सुविधा आणि औषध विभाग परिपूर्ण असणे गरजेचे आहे.

त्यामुळे या विभागात अतिरिक्त पदे निर्माण केली असून, त्यासंबंधीची फाईल सरकारला या अगोदरच सादर केली असल्याचे राणे यांनी सांगितले. या विभागाचे अत्याधुनिक अद्वितीय मॉडेल बनवून देशाला दाखवून देऊ. त्यानंतर टप्प्याटप्प्याने दक्षिण गोव्यातील जिल्हा रुग्णालय आणि पेडणे उपजिल्हा रुग्णालय हेही अत्याधुनिक सुविधांच्या साहाय्याने सक्षम केले जाईल, अशी माहिती राणे यांनी दिली.