Goa News: मडगाव येथील कचऱ्याची समस्या जटील बनली आहे. सोनसोडो येथे कचऱ्याचे मोठे ढीग आहेत. आणखी कचरा घालण्यास पुरेशी जागा नाही. त्यामुळे नगरपालिकेने मडगावमधील कचरा दररोज साळगाव येथील कचरा व्यवस्थापन प्रकल्पात पाठविण्याचा निर्णय घेतला आहे. जास्त करून हा कचरा पुढील आठवड्यापासून साळगाव प्रकल्पात पाठविण्यास सुरवात होईल.

गोवा कचरा व्यवस्थापन मंडळानेही असा कचरा दररोज साळगाव येथील प्रकल्पात पाठविण्याची परवानगी दिली आहे. त्यामुळे मडगावमधील कचऱ्याची समस्या अंशता कमी होण्याची शक्यता वर्तविण्यात येत आहे.

सोनसोडो कचरा प्रकल्पात क्षमतेपेक्षा जास्त कचरा आहे. त्यामुळे दररोज एकत्र केलेल्या कचऱ्याचे काय करायचे, हा प्रश्र्न आमच्यापुढे आहे. येथे जो 10 टन कचरा एकत्रित झाला आहे तो दररोज साळगाव प्रकल्पात पाठविला जाईल. त्यासाठी आम्ही वाहनांची व्यवस्था करीत आहोत, असे मुख्याधिकारी मानुएल बार्रेटो यांनी पत्रकारांना सांगितले.

तीन महिन्यांपूर्वीच हिंदुस्तान वेस्ट ट्रीटमेंट प्रायव्हेट लिमिडेट कंपनीमार्फत गोवा कचरा व्यवस्थापन महामंडळाने सोनसोडो येथील 14380 क्युबिक मीटर कचऱ्याची विल्हेवाट लावलेली.